ரயில் பயணிகள் கட்டணம் 10 சதவீதம் உயர்த்த திட்டம்

ரயில் பயணிகள் கட்டணம் 10 சதவீதம் உயர்த்த திட்டம்

ரயில் பயணிகள் கட்டணத்தை 5 முதல் 10 சதவீதம் வரை உயர்த்த ரயில்வே திட்டமிட்டுள்ளதாகவும், பட்ஜெட்டில் இதற்கான அறிவிப்பு வெளியாகும் எனவும் கூறப்படுகிறது.ரயில்வே துறை நஷ்டத்தில் உள்ளதாகவும், இதற்கான நிதி ஆதாரங்களை பெருக்க நடவடிக்கை எடுக்கப்பட்டு வருவதாகவும் ரயில்வே அமைச்சர் சுரேஷ் பிரபு கூறி வருகிறார். இந்நிலையில் ரயில் பயணிகள் மற்றும் சரக்கு கட்டண வருவாய் சரிவடைந்துள்ளது. அதோடு, இத்துறையில் 7வது சம்பள கமிஷனை அமல்படுத்த அரசுக்கு ரூ.32,000 கோடி கூடுதல் தேவை ஏற்படும்.  அதோடு, ரயில்வே துறைக்கு நிதியமைச்சகம் பட்ஜெட் ஒதுக்கீடாக ரூ.8,000 கோடி மட்டுமே அளிக்க இருக்கிறது. எனவே, பட்ஜெட்டில் ரயில் பயணிகள் கட்டணம் உயர்த்தப்படுவதற்கான வாய்ப்புகள் அதிகம் உள்ளன என ரயில்வே அமைச்சக வட்டாரங்கள் தெரிவிக்கின்றன.

இப்போது இதுகுறித்த இறுதி முடிவு எதுவும் எடுக்கப்படவில்லை. இருப்பினும் வருவாயை அதிகரிக்க பயணிகள் கட்டணம் 10 சதவீதம், சரக்கு கட்டணம் 5 சதவீதம் உயர்த்த ஒரு ஆய்வில் பரிந்துரை அளிக்கப்பட்டுள்ளது. டிக்கெட் விலை உயர்த்துவது இத்துறைக்கு பெரும் லாபத்தை ஈட்டித்தரும் என்று சம்பந்தப்பட்ட வட்டாரங்களில் கூறப்படுகிறது.  தற்போது உள்ள கட்டணங்கள் அதிகம்தான் என்றாலும், நடப்பு நிதியாண்டில் கடந்த ஜனவரி வரை ரயில்வேக்கு பயணிகள் மற்றும் சரக்கு போக்குவரத்து வருவாய் ரூ.1,36,079.26 கோடியாக உள்ளது. இது நிர்ணயிக்கப்பட்ட இலக்கை விட 3.77 சதவீதம் குறைவு என ரயில்வே அமைச்சகம் தரப்பில் கூறப்படுகிறது.