சர்வதேச விசாரணைக்கு ஆதரவு திரட்டும் வகையில் 13 ஆபிரிக்க நாடுகளுடன் புலம்பெயர் தமிழர் பேச்சு !

by **அருள்** Mon Dec 30, 2013 7:38 am

சர்வதேச விசாரணைக்கு ஆதரவு திரட்டும் வகையில் 13 ஆபிரிக்க நாடுகளுடன் புலம்பெயர் தமிழர் பேச்சு !

இலங்கை மீது சர்வதேச விசாரணைக்கு ஆதரவு திரட்டும் வகையில் ஐ.நா. மனித உரிமைகள் சபையில் அங்கம் வகிக்கும் 13 ஆபிரிக்க நாடுகளையும் தனித்தனியே சந்தித்துப் பேச்சு நடத்துவதற்கு புலம்பெயர் தமிழ் அமைப்புகள் தீர்மானித்துள்ளன.

இதன்படி, உலகத் தமிழர் பேரவையின் உயர்மட்டப் பிரமுகர்கள், ஜனவரி நடுப்பகுதியில் ஆபிரிக்க நாடுகளுக்குப் பயணம் செய்யவுள்ளனர் என்றும் அதற்கான ஏற்பாடுகள் தற்போது இடம்பெறுகின்றன என்றும் அறியமுடிகின்றது.

இதுதொடர்பில் உலகத் தமிழர் பேரவையின் தலைவர் வண. இம்மானுவேல் தெரிவிக்கையில்,

தமிழ் மக்களுக்கு நீதியைப் பெற்றுக்கொடுப்பதற்காக நாம் அனைத்து நடவடிக்கைகளையும் மேற்கொள்வோம். இதற்காக ஆபிரிக்க நாடுகளுடனும் தனித்தனியே பேச்சு நடத்துவோம்.

குறிப்பாக மேற்குலக நாடுகளில்தான் புலம்பெயர் தமிழர்கள் கணிசமாக வாழ்கின்றனர். அங்கு எமது அமைப்புகளும் இருக்கின்றன. ஆனால், ஆபிரிக்க நாடுகளைப் பொறுத்தமட்டில் அங்கு புலம்பெயர் தமிழர்கள் பெரிதாக இல்லை. எனவே, எமது குழுவினர் சென்று அந்நாட்டு அரச பிரதிநிதிகளிடம் தனித்தனியாகப் பேச்சு நடத்த வேண்டியுள்ளது என்றார்.

ஐ.நா. மனித உரிமைகள் சபையில் அங்கம் வகிக்கும் 47 நாடுகளுள் 13 நாடுகள் ஆபிரிக்க நாடுகளாகும். இவற்றில் பெரும்பாலான நாடுகள் இலங்கைக்குச் சார்பாகச் செயற்படும் போக்கை கொண்டவையாகும். கடந்தமுறை அமெரிக்கா கொண்டுவந்த பிரேரணைக்கு கொங்கோ, உகண்டா ஆகிய நாடுகள் எதிர்த்து வாக்களித்திருந்தன.

வாக்கெடுப்பில் பங்கேற்காமல் இலங்கைக்கு மறைமுக ஆதரவை வழங்கிய 8 நாடுகளுள் அங்கோலா, பொட்ஸுவானா, பேர்க்கினாபசோ, செனகல் ஆகிய ஐந்து நாடுகளும் ஆபிரிக்க நாடுகளாகும் என்பது குறிப்பிடத்தக்கது.

எனவே, இலங்கை மீது சர்வதேச விசாரணையை வலியுறுத்தி இம்முறை பிரேரணை ஏதாவது வந்தால் அதை ஆதரிக்குமாறு கோரிக்கை விடுக்கும் நோக்கிலும் இலங்கைக்கு சார்பான இராஜதந்திர நகர்வுகளில் ஈடுபடவேண்டாம் என கோரிக்கை விடுக்கும் வகையிலுமே ஆபிரிக்க நாடுகளுடன் உலகத் தமிழர் பேரவை பேச்சு நடத்தவுள்ளது.

மற்றுமொரு ஆபிரிக்க நாடான கென்யா இலங்கையுடன் சிறந்த நட்புறவை பேணுகிறது என கூறப்பட்டாலும் இரு நாடுகளுக்குகிடையில் தேயிலை ஏற்றுமதி விவகாரத்தில் பணிப் போர் நிலவுகின்றமை சுட்டிக் காட்டத்தக்கது. இலங்கையில் பொதுநலவாய மாநாடு நடைபெற்ற போதும் அதற்கு எதிராக கென்யா பரப்புரையை முன்னெடுத்தது என சர்வதேச ஊடகங்கள் செய்தி வெளியிட்டிருந்தன.

எனவே, இம்முறை வாக்களிக்கும் தகுதிப்பெற்றுள்ள கென்யா எவ்வாறான நிலைப்பாட்டை எடுக்கும் என்பது இராஜதந்திர இரகசியமாகும். அமெரிக்கப் பிரேரணையை ஆதரித்திருந்து பெனின் நாட்டுக்கு 2014 வரை மனித உரிமை சபையில் அங்கத்துவம் இருக்கின்றது.

அதேவேளை, தெற்கு மற்றும் மத்திய ஆசிய விவகாரங்களுக்குப் பொறுப்பான அமெரிக்காவின் உதவி இராஜாங்கச் செயலாளர் தலைமையில் இலங்கை வரவுள்ள அமெரிக்க இராஜதந்திரிகள் குழுவுக்கு உலகத் தமிழர் பேரவை கடிதமொன்றை எழுதவும் உத்தேசித்துள்ளது.

இதற்கிடையில் ஜெனிவா இராஜதந்திரச் சமரை எதிர்கொள்வதற்கு இலங்கை அரசும் தயாராகி வருகின்றது. இதன் ஓர் அங்கமாக அமைச்சர்களை மட்டத் தூதுக்குழுவை ஜனவரியில் பரப்புரைகளுக்காக களமிறக்க அது தீர்மானித்துள்ளது.

ஐ.நா. மனித உரிமைகள் சபையில் அங்கம் வகிக்கும் 47 நாடுகளுள் 13 நாடுகள் ஆபிரிக்க நாடுகளாகும். இவற்றில் பெரும்பாலான நாடுகள் இலங்கைக்கு சார்பாகச் செயற்படும் போக்கை கொண்டவையாகும்.