பிளஸ் 2 தேர்வு முறைகேட்டுக்கு உடந்தையா? அரசு பள்ளி ஆசிரியர்கள் 31 பேருக்கு சம்மன் எம்எம்எஸ்&ல் கேள்வித்தாள் அவுட் விசாரணையில் திடுக் தகவல்கள்

by **Tamil** Sat Apr 20, 2013 8:14 am

நாமக்கல்: நாமக்கல் அருகே தனியார் பள்ளியில் நடந்த பிளஸ் 2 தேர்வு முறைகேடு
தொடர்பாக அரசு அதிகாரி அதிரடியாக கைது செய்யப்பட்டார். முறைகேட்டுக்கு
உடந்தையாக இருந்திருக்கலாம் என்ற சந்தேகத்தின் பேரில் அரசு பள்ளி
ஆசிரியர்கள் 31 பேருக்கு போலீசார் சம்மன் அனுப்பியுள்ளனர். முறைகேடு
குறித்து பல திடுக்கிடும் தகவல்கள் வெளியாகியுள்ளது.தமிழகத்தில் கடந்த
மாதம் பிளஸ் 2 பொதுத் தேர்வு நடந்தது. மார்ச் 11&ம் தேதி நடந்த
இயற்பியல் தேர்வின்போது, நாமக்கல் அருகே உள்ள தனியார் பள்ளியில் ஒரு
மதிப்பெண் கேள்விக்கான விடைகள் அட்டையில் எழுதி மாணவர்களுக்கு காட்டியது
பறக்கும் படையால் கண்டுபிடிக்கப்பட்டது. இதையடுத்து, அந்த பள்ளியின் தேர்வு
மையம் தற்காலிகமாக ரத்து செய்யப்பட்டது. தனியார் பள்ளி நிர்வாகிகள்,
ஆசிரியர்கள் மீது தேர்வுத்துறை இயக்குனர் வசுந்தராதேவி, நாமக்கல்
எஸ்.பி.யிடம் புகார் அளித்தார்.

இது தொடர்பாக மாவட்ட குற்றப்பிரிவு
இன்ஸ்பெக்டர் விஸ்வநாதன் வழக்கு பதிவு செய்து விசாரித்தார். விடைகளை
அட்டையில் எழுதி காட்டிய வாட்ச்மேன் முருகேசன், ஓ.ஏ. செல்வகுமார்,
உடற்கல்வி ஆசிரியர் யுவராஜ் ஆகிய 3 பேர் இரண்டு வாரத்துக்கு முன்பு கைது
செய்யப்பட்டனர். அவர்களிடம் போலீசார் நடத்திய விசாரணையில் பள்ளியின்
பங்குதாரர்கள் அறிவுறுத்தலின் பேரில்தான் இதை செய்ததாக தெரிவித்தனர்.
இதையடுத்து அந்த பள்ளியின் ஆசிரியர்கள், பங்குதாரர்களிடம் போலீசார் விசாரணை
நடத்தினர்.பள்ளியின் பங்குதாரர் அருண்குமார், இயற்பியல் ஆசிரியர் சரவணன்,
வரலாறு ஆசிரியர் பிரபு, மற்றொரு ஆசிரியர் சண்முகசுந்தரம் ஆகியோருக்கு
முறைகேட்டில் தொடர்பு இருப்பது தெரியவந்தது. இவர்களின் செல்போன் எண்களை
போலீசார் ரகசியமாக கண்காணித்தபோது, குறிப்பிட்ட நாளில் 3 பேரும் பலமுறை
தொடர்பு கொண்டு பேசியது தெரியவந்தது.

இதையடுத்து அருண்குமாரை (43)
போலீசார் நேற்று கைது செய்தனர். அவரை கோர்ட்டில் ஆஜர்படுத்தி சிறையில்
அடைத்தனர். கைதான அருண்குமார், ஓ.சவுதாபுரம் ஆரம்ப சுகாதார நிலையத்தில்
சுகாதார ஆய்வாளராக பணியாற்றி வருகிறார். இவரது மனைவியின் பெயரில் தனியார்
பள்ளியில் பார்ட்னராக சேர்ந்துள்ளார்.தலைமறைவாக உள்ள ஆசிரியர்கள் பிரபு,
சரவணன், சண்முகசுந்தரம் ஆகியோரை போலீசார் தேடி வருகிறார்கள். தனியார்
பள்ளியில் தேர்வு பணியில் ஈடுபட்டிருந்த அரசு பள்ளி ஆசிரியர்களும்
முறைகேட்டுக்கு துணைபோயிருக்கலாம் என போலீசார் சந்தேகிக்கின்றனர்.
இதையடுத்து, முறைகேடு நடந்த தனியார் பள்ளியில் இயற்பியல் தேர்வின்போது
கண்காணிப்பு பணியில் ஈடுபட்ட அரசு பள்ளி தலைமை ஆசிரியர், ஆசிரியர்,
ஆசிரியைகள் என 31 பேருக்கு போலீசார் சம்மன் அனுப்பியுள்ளனர். அவர்களை
தனித்தனியாக அழைத்து விசாரணை நடத்த உள்ளனர்.

எம்எம்எஸ் மூலம் வினாத்தாள் அவுட்

தேர்வு
முடிவதற்கு ஒரு மணி நேரத்துக்கு முன்புதான் விடைகள் அடங்கிய அட்டைகள்
கொண்டுவரப்பட்டு மாணவர்களுக்கு காட்டப்பட்டுள்ளது. கேள்வித்தாள் எப்படி
கிடைத்தது என்பது குறித்து போலீசார் விசாரணை நடத்தினர். முறைகேடு நடந்த
தனியார் பள்ளியின் இயற்பியல் ஆசிரியர் சரவணனுக்கு ராசிபுரம் சிவானந்தா
சாலையில் உள்ள அரசு மேல்நிலைப் பள்ளியில் பணி வழங்கப்பட்டிருந்தது.
இயற்பியல் தேர்வன்று சரவணன் பணிக்கு செல்லவில்லை. அவருக்கு பதில் தனியார்
பள்ளி வரலாறு ஆசிரியர் பிரபு சென்றுள்ளார்.

தேர்வு துவங்கிய சற்று
நேரத்தில் பிரபு தனது மொபைல் போனில் ஒரு மார்க் கேள்விகளை 2 பக்கமாக போட்டோ
எடுத்து, எம்எம்எஸ் மூலம் பள்ளி நிர்வாகி அருண்குமாரின் மொபைலுக்கு
அனுப்பியுள்ளார். அதை சரவணனிடம் அருண்குமார் கொடுத்துள்ளார். அதன்பிறகே
அவசர அவரசமாக விடைகள் தயார் செய்யப்பட்டு, ஒவ்வொரு விடையும் கம்யூட்டரில்
ஏ4 ஷீட்டில் பெரிய எழுத்தில் டைப் செய்து அட்டையில் ஒட்டி மாணவர்களுக்கு
காட்டப்பட்டுள்ளது தெரியவந்துள்ளது. இதையடுத்து அருண்குமாரிடம் இருந்த
சிம்கார்டை போலீசார் பறிமுதல் செய்துள்ளனர். எம்எம்எஸ் எடுத்து அனுப்பிய
செல்போன் ஏற்கனவே உடைக்கப்பட்டுவிட்டது.

மாணவர்களுக்கு காட்டப்பட்ட
விடைகள் அடங்கிய அட்டையை இணை இயக்குனர் கார்மேகம் தலைமையிலான பறக்கும்
படையினர் பறிமுதல் செய்தனர். அதில் இருந்த விடைகளை ஒப்பிட்டு பார்த்தபோது
13 விடைகளில் 3 விடைகள் தவறானவை என்பதும் தற்போது தெரியவந்துள்ளது.