77 வயதில் பிளஸ் 2 தேர்வு : தள்ளாத வயதில் தளராத முயற்சி

by **மாலதி** Fri Mar 05, 2010 7:08 am

மதுரை
: மதுரையில் ஓய்வு பெற்ற கூட்டுறவுத் துறை அதிகாரி, 77 வயதில் பிளஸ் 2
தேர்வை எழுதி வருகிறார். மதுரை தபால்தந்தி நகர் பசுபதி நகரை சேர்ந்தவர்
வீரமுத்து (77). ஓய்வு பெற்ற கூட்டுறவுதுறை அதிகாரி. நாமக்கல் மாவட்டம்
ராசிபுரம் அருகேயுள்ள குருசாமி பாளையத்தை சேர்ந்த இவரது பிறந்த தேதி
15.4.1933. எஸ்.எஸ்.எல்.சி.,படிப்பை 1950 ல் முடித்தார். அதற்கு மேல்
படிக்க இயலாத நிலையில், 1974ல் மதுரையில் பாண்டியன் சூப்பர்
மார்க்கெட்டில் பணியாற்றினார். பின், கூட்டுறவு துறை துணைப் பதிவாளராக
பணியாற்றி 1992ல் ஓய்வு பெற்றார்.

இவருக்கு
மனைவி, 2 மகன்கள், 3 மகள்கள் உள்ளனர். அந்தக் காலத்தில் எஸ்.எஸ்.எல்.சி.,
படித்த அவருக்கு, மேல்படிப்பு படிக்க வேண்டும் என்ற விருப்பம்
நிறைவேறவில்லை. பணியாற்றி ஓய்வு பெற்றதும், வீட்டில் சும்மா இருக்க
பிடிக்காமல், யோகா வகுப்புக்கு செல்ல துவங்கினார். பீபிகுளம் பகுதியில்
உள்ள மனவளக் கலை மன்றம் அறிவு திருக்கோயிலுக்கு சென்ற அவர், யோகாவை
மற்றவர்களுக்கும் கற்பித்தார். பட்ட, மேற்படிப்பு மாணவர்களுக்கு யோகா
படிப்பில் டிகிரி கற்பிக்கலாம் என்ற எண்ணம் ஏற்பட்டவே, தனது படிப்பை தொடர
நினைத்தார். பிளஸ் 2 ல் வரலாறு, பொருளியல், வணிகவியல், கணக்கு பதிவியல்
பாடத்தை ஆங்கில வழியில் படித்தார். இந்த ஆண்டு தேர்வுக்கு விண்ணப்பித்த
அவர், மதுரை கல்லூரி மேல்நிலைப் பள்ளி தேர்வு மையத்தில் தனித்தேர்வராக
எழுதி வருகிறார்.

அவர் கூறியதாவது:
பிளஸ் 2 பாடங்களை சுயமாக கற்று வருகிறேன். குடும்பத்தினர் என்னை
அதிகாலையில் எழுப்பி, டீ கொடுத்து படிக்கச் சொல்கின்றனர். தேர்வை நன்கு
எழுதி வருகிறேன். பிளஸ் 2 ல் 1200க்கு ஆயிரம் மதிப்பெண்கள் பெறுவேன் என்று
நம்புகிறேன். அதன்பின், பாரதியார், பாரதிதாசன் பல்கலைகளில் யோகா தொடர்பாக
பட்டப்படிப்பை தொடர்வேன். தற்போது மாணவர்களை போல படித்து வருவது புதிய
அனுபவமாக உள்ளது. தேர்வு எழுதுவதற்கு வயது காரணமாக கைநடுங்கினாலும்,
அவ்வப்போது சற்று ஓய்வு எடுத்து எழுதுகிறேன். ஏற்கனவே, நான் அவ்வப்போது
கடிதங்கள் எழுதி பயிற்சி பெற்றதால், தேர்வை அதிக சிரமமின்றி எழுத
முடிகிறது. நான் தினமும் காலையில் முக்கால் மணி நேரம் யோகா, மாலையில்
முக்கால் மணி நேரம் ஜாக்கிங் என பயிற்சி மேற்கொள்வேன். இதனால் உடலும்,
மனமும் நல்ல ஆரோக்கியத் துடன் இருப்பதாக உணர்கிறேன். 45 வயதில் தேர்வு
எழுதும் சிலர் என்னிடம், "தேர்வு எழுத தயங்கிய எங்களுக்கு, உங்களை
(வீரமுத்துவை) பார்த்து ஆர்வம் பிறந்துவிட்டது' என்றனர். இது எனக்கு
மகிழ்ச்சியை தருகிறது. என் ஆயுள் உள்ள வரை படிக்க ஆசைப்படுகிறேன், என்றார்.