அழகிரியும் திமுகவும் (தேர்தல் ஸ்பெஷல்)

by **அருள்** Fri Mar 04, 2011 1:32 pm

இந்தியாவில் ஒருவர் மத்திய அமைச்சராகப்
பணிபுரிய அடிப்படையாகத் தேவைப்படுவது கொஞ்சம் ஆங்கில அறிவு தான். இதுவரை
தமிழ்நாட்டிலிருந்து எவ்வளவோ பேர் எம்.பி.ஆக, எம்.எல்.ஏ-வாகச்
சென்றிருக்கிறார்கள். அவர்களில் சிலர் வெறும் பட்லர் இங்கிலீஸை வைத்து
ஒப்பேற்றியவர்கள் தான். பிற மாநிலத்திலிருந்து வருவோர் ஹிந்தியை வைத்துச்
சமாளிப்பதும் உண்டு.

அழகிரியும் திமுகவும் (தேர்தல் ஸ்பெஷல்) Azakiri

ஆனால்
ஆங்கிலமும் தெரியாமல், ஹிந்தியும் தெரியாமல் கலைஞருக்கு மகன் என்ற ஒரே
தகுதியுடன் அழகிரி மத்திய அமைச்சராக்கப் பட்டார். அதன் விளைவு, திராவிட
இயக்கத்தின் அடிநாதமாகிய ‘ஹிந்தி எதிர்ப்புப் போராட்டம்’ கேலிக்குரியதாக
ஆகியதுதான். தனக்கேயுரிய நியாயங்களை அப்போது கொண்டிருந்த, பலரின்
தியாகத்தால் நடத்தப்பட்ட ஹிந்தி எதிர்ப்புப் போராட்டத்தை கேவலப்படுத்தியது
தான் அழகிரி அரசியலுக்கு வந்து செய்த மாபெரும் தவறு.

ஏன் இது நிகழ்ந்தது என்று
பார்த்தால், அதன் காரணமாக முன் நிற்பது தா.கிருட்டிணன் கொலையும், சன்.டிவி
ஊழியர்கள் கொலையும், குடும்பச் சண்டையும் தான்.

தா.கிருட்டிணன் கொலைவழக்கில்
குற்றவாளியாகவே சேர்க்கப்பட்டார் அழகிரி. சன் டிவி அலுவலகத் தாக்குதலிலும்
மாறன் சகோதரர்களால் நேரடியாகவே ரவுடி என குற்றம் சாட்டப்பட்டார். இந்த
வழக்குகளிலிருந்து தப்பிப்பதற்காக அரசியல் பாதுகாப்பு வேண்டி
எம்.பி.ஆக்கப்பட்டார் அழகிரி. மாறன் பிரதர்ஸின் அதிகாரத்தைக் குறைக்கும்
முகமாக மத்தியில் அமைச்சராகவும் ஆக்கப்பட்டார் அழகிரி.

தொடர்ந்து 12 வருடம் தமிழ்
மீடியத்திலேயே படித்து வந்த என்னைப்போன்றவர்கள், கல்லூரியில் ஒன்று/இரண்டு
வருடத்திற்குள்ளாகவே ஆங்கிலம் கற்றுத் தேர்ந்திருக்கிறோம். கூலி வேலைக்கு
மும்பை செல்லும் பல தமிழர்கள் ஒரு மாதத்திற்குள் ஹிந்தி பேசுவதையும்
கண்டிருக்கிறோம். (உண்மையில் ஆங்கிலத்தை விட, ஹிந்தி எளிது..வாக்கிய
அமைப்பு தமிழ் போன்றே இருப்பதால்!)

ஆனால் நாட்டின் அமைச்சர்
பொறுப்பையே கொடுத்தும் தன்னைத் தகுதிப் படுத்திக்கொள்ளத் தவறியதன் மூலம்
’தமிழர்கள் தற்குறிகள்’ என்ற ஹிந்தி வாலாக்களின் கருத்தை உறுதிப்படுத்தும்
விதமாகவே நடந்து கொண்டார் அழகிரி. அஞ்சாநெஞ்சன் என்ற அடைமொழியோடு போனவர்
தொடைநடுங்கியாக வந்து சேர்ந்தார். ஆங்கிலத்தில் ஒன்று சொல்வார்கள்
‘Survival of the Fittest!'. அதன் அர்த்தமாவது அழகிரிக்கு இப்போது
புரிந்திருக்கும்.

அழகிரியும் திமுகவும் (தேர்தல் ஸ்பெஷல்) Azhagiri

உண்மையில்
தான் ஒரு திறமையான நிர்வாகி என அழகிரி நிரூபிக்க நல்லவொரு வாய்ப்பைக்
கலைஞர் கொடுத்தார். இன்னும் அந்த வாய்ப்பு இருக்கவே செய்கிறது. ஆனால்
தமிழக அரசியலிலேயே கண்ணாக அழகிரி இருப்பது தான் பிரச்சினையே.

ஸ்டாலின் கட்சிக்காக ஆற்றிய
பணிகளையும், அனுபவித்த சிறைவாசத்தையும் ஒப்பிடும்போது அழகிரிக்கு
கொடுக்கப்படும் முக்கியத்துவம் ரொம்பவே அதிகம் தான். இதை நல்லமுறையில்
உபயோகித்து, டெல்லியில் தன்னை நிலைநிறுத்திக் கொள்வதே அழகிரிக்கும்
திமுகவிற்கும் நல்லது.

டெல்லியில் பட்ட அவமானம்,
கனிமொழி & கோ மீதான கடுப்பு, ஸ்டாலின் துணை முதல்வர் நாற்காலியைக்
கைப்பற்றியது போன்ற காரணங்களால் கடுப்பில் இருக்கிறார் அழகிரி. கலைஞரும்
எதனாலோ அழகிரியைப் பெரிதாக எடுத்துக் கொள்ள மாட்டேங்கிறார். எனவே வருகின்ற
தேர்தலில் அழகிரியின் ஒத்துழைப்பு எந்த அளவிற்கு இருக்கும் என்பது அரசியல்
வட்டாரத்தில் கூர்ந்து கவனிக்கப்படுகிறது.

2001ல் அழகிரி ஒத்துழைக்காத
காரணத்தாலேயே பி.டி.ஆர் போன்ற பெரும் தலைகளே தோற்றார்கள். அதுவே அதிமுக
ஆட்சிக்கு வரவும் உதவியது. இந்த முறையும் அழகிரி முறுக்கிக் கொண்டு
நின்றால், திமுகவிற்குப் பெரும் பின்னடைவே ஏற்படும்.

அழகிரியின் இத்தகைய போக்கு தொடர்ந்தால், எம்.ஜி.ஆரின் மறைவுக்குப் பின்
ஜெ-ஜானகி என இரு அணியாகப் பிரிந்து, ஒரு தேர்தலில் அடிவாங்கித்
திருந்தியது போலவே கலைஞர் காலத்திற்குப் பின் திமுகவிற்கும் நடக்கும்.
அப்போது ஜானகியை விடவும் மோசமாக, ஸ்டாலின் - மாறன் கூட்டணியால் காலி
செய்யப்படுவார் அழகிரி.

அழகிரியும் திமுகவும் (தேர்தல் ஸ்பெஷல்) Maran_azhagiri_stalin_20090

அழகிரியிடம்
உள்ள நல்ல பழக்கம், தொண்டர்களுடன் நெருங்கிப் பழகும் எளிய குணம். அதுதான்
இத்தனை குறைபாடுகளுடன் இருந்தாலும் அவரை தொண்டர்கள் விரும்புவதற்கான
காரணம்.

மக்கள் மத்தியில் தனக்கிருக்கும் ரவுடி இமேஜையும் ‘செயல்படாத அமைச்சர்’
இமேஜையும் மாற்றினால் மட்டுமே அழகிரிக்கு அரசியலில் வாழ்வுண்டு. உணர்வாரா?