காங்., எதிர்க்கட்சிகள் பலப்பரீட்சை ஆரம்பம்: முன்கூட்டியே லோக்சபா தேர்தல் வருமா?

by **அருள்** Mon Dec 13, 2010 7:58 am

புதுடில்லி : ஸ்பெக்ட்ரம், ஆதர்ஷ், காமன்வெல்த் போட்டிகள் ஆகியவற்றில்
நடந்த ஊழல் விவகாரத்தில், காங்கிரசுக்கும், எதிர்க்கட்சிகளுக்கும் இடையே
பலப்பரீட்சை ஆரம்பமாகியுள்ளது. எதிர்க்கட்சிகளின் போராட்டம்,
பார்லிமென்டின் அடுத்த கூட்டத் தொடரிலும் தொடர்ந்தால், லோக்சபாவுக்கு
முன்கூட்டியே தேர்தல் வரக் கூடும் என்ற பேச்சும் எழுந்துள்ளது.
"ஸ்பெக்ட்ரம் "2ஜி' ஒதுக்கீடு, ஆதர்ஷ் அடுக்கு மாடி குடியிருப்பு,
காமன்வெல்த் போட்டிகள் ஆகியவற்றில் நடந்த ஊழல் குறித்து, பார்லிமென்ட்
கூட்டுக் குழு விசாரிக்க வேண்டும்' என, பா.ஜ., - இடதுசாரி கட்சிகள்
உள்ளிட்ட அனைத்து எதிர்க்கட்சிகளும் வலியுறுத்தி வருகின்றன. மத்திய அரசு
இதை ஏற்க மறுத்து வருகிறது.இதனால், பார்லிமென்ட் குளிர்கால கூட்டத் தொடர்
முற்றிலும் முடங்கிப் போய்விட்டது. கூட்டத் தொடரில், இன்று ஒரு நாள்
மட்டுமே மீதமுள்ளது. எதிர்க்கட்சிகளின் போராட்டம் காரணமாக, இன்றும்
பார்லிமென்ட் நடப்பதற்கான வாய்ப்பு இல்லை என்றே தகவல்கள்
தெரிவிக்கின்றன.இந்த விஷயத்தில் எதிர்க்கட்சிகள் ஒருங்கிணைந்து குரல்
எழுப்பி வருவதால், மத்திய அரசுக்கு கடும் நெருக்கடி ஏற்பட்டுள்ளது. ஊழல்
விவகாரங்களை விசாரிக்க, பார்லிமென்ட் பொது கணக்குக் குழு, ஒரு நபர் கமிஷன்
என, பல ஆலோசனைகளை மத்திய அரசு தெரிவித்தாலும், பார்லிமென்ட் கூட்டுக் குழு
விசாரணை தான் தேவை என்பதில் எதிர்க்கட்சிகள் பிடிவாதமாக உள்ளன.
குளிர்கால கூட்டத் தொடர் முடிந்தாலும், அடுத்தாண்டு பிப்ரவரியில்
நடக்கவுள்ள பார்லிமென்ட் பட்ஜெட் கூட்டத் தொடரிலும், இதே பிரச்னையை
வலியுறுத்த எதிர்க்கட்சிகள் திட்டமிட்டுள்ளன. அப்போதும், பார்லிமென்டில்
ஆளும் கட்சிக்கு நெருக்கடியை ஏற்படுத்த வேண்டும் என, எதிர்க்கட்சிகள்
கருதுகின்றன.
எதிர்க்கட்சிகள் தீவிரம்: மேலும், பார்லிமென்டின் அடுத்த
கூட்டத் தொடர் வரை, ஊழல் விவகாரங்கள் மறக்கடிக்கப்படாமல் இருப்பதற்கான
நடவடிக்கைகளிலும் எதிர்க்கட்சிகள் தீவிரமாக உள்ளன. வரும் 22ம் தேதி டில்லி
ராம்லீலா மைதானத்தில், ஊழல் விவகாரங்களை எதிர்த்தும், பார்லிமென்ட்
கூட்டுக் குழு விசாரணை கோரியும் பிரமாண்ட பொதுக் கூட்டத்தை நடத்தவும்
எதிர்க்கட்சிகள் திட்டமிட்டுள்ளன.இந்த விஷயத்தில் இடதுசாரி கட்சிகள்
தீவிரமாக உள்ளன. பா.ஜ., அல்லாத தெலுங்கு தேசம், அ.தி.மு.க., - பிஜூ ஜனதா
தளம் உள்ளிட்ட எதிர்க்கட்சி தலைவர்களுடன் இதுகுறித்து ஆலோசனை நடத்த,
இடதுசாரி கட்சிகள் திட்டமிட்டுள்ளன.
இதுகுறித்து இந்திய கம்யூனிஸ்ட் கட்சியின் தேசிய செயலர் டி.ராஜா கூறுகையில்,
"எங்கள் கட்சியின் தேசிய கவுன்சில் கூட்டம், ஐதராபாத்தில் நாளை (14ம்
தேதி) முதல் 16ம் தேதி வரை நடக்கவுள்ளது. இதில், அடுத்த கட்ட நடவடிக்கைகள்
குறித்து ஆய்வு செய்யப்படும். இதைத் தொடர்ந்து, ஊழல் விவகாரங்களுக்கு
எதிராக போராட்டம் நடத்துவது குறித்து, பிற எதிர்க்கட்சிகளுடன்
ஆலோசிப்போம்' என்றார்.
எதிர்க்கட்சிகளின் போராட்டத்தை சமாளிக்க, காங்கிரஸ் கட்சியும் தயாராகி
வருகிறது. இதன்முதல் கட்டமாக, இன்று காங்கிரஸ் எ ம்.பி.,க்கள் பொதுக்குழு
கூட்டம் நடக்கிறது . அதில் கட்சித் தலைவர் சோனியா, ஸ்பெக்ட்ரம் விவகாரம்
பற்றி கட்சி கொண்டிருக்கும் அணுகுமுறையை வெளியிடுவார் என்ற எதிர்பார்ப்பு
இருக்கிறது. ஏனெனில், அடுத்தடுத்த ஊழல்களால் ஏற்பட்ட நெருக்கடி குறித்து
அவர் எம்.பி.,க்களுக்கு வழிகாட்டியாக வேண்டும் என்ற எதிர்பார்ப்பு
காணப்படுகிறது.மேலும், வரும் 18ம் தேதி காங்கிரஸ் கட்சியின் முக்கிய
நிர்வாகிகள் பங்கேற்கும் மாநாட்டை கூட்டவும் காங்கிரஸ் முடிவு
செய்துள்ளது. ஐக்கிய முற்போக்கு கூட்டணி அரசு, இரண்டாவது முறையாக
பதவியேற்றபின் நடக்கும் முதல் மாநாடு இது என்பதால், அரசியல் வட்டாரத்தில்
முக்கியத்துவம் வாய்ந்த நிகழ்வாக இது கருதப்படுகிறது.
ஏனெனில், அடுத்த ஆண்டில் தமிழகம், புதுச்சேரி, கேரளா, அசாம் மற்றும்
மேற்கு வங்கத்தில் சட்டசபை தேர்தல் நடக்கவிருப்பதால், அதற்கு முன்
கட்சியின் செல்வாக்கை நிலைநிறுத்த வழிகண்டாக வேண்டும்.இந்த
மாநாட்டின்போது, எதிர்க்கட்சிகளின் போராட்டத்தை சமாளிப்பதற்கு மேற்கொள்ள
வேண்டிய வழிமுறைகள் குறித்து ஆலோசித்து முடிவு எடுக்கப்படும் என,
எதிர்பார்க்கப்படுகிறது. இதில் அதிரடியான முடிவுகள் எடுக்கப்படும் என,
காங்கிரஸ் வட்டாரங்கள் கூறுகின்றன.
தேர்தல் வருமா? காங்கிரசுக்கும், எதிர்க்கட்சிகளும் இடையேயான
மோதல் விஸ்வரூபம் எடுத்துள்ளதால், லோக்சபாவுக்கு முன்கூட்டியே தேர்தல்
வரக் கூடும் என்றும் பேச்சு எழுந்துள்ளது. பார்லிமென்ட் கூட்டுக் குழு
விசாரணை கோரி, பார்லிமென்டின் அடுத்த கூட்டத் தொடரிலும் எதிர்க்கட்சிகள்
போர்க்கொடி தூக்கும் பட்சத்தில், லோக்சபாவுக்கு முன்கூட்டியே தேர்தல்
வருவதற்கான வாய்ப்பு அதிகமாக உள்ளதாக அரசியல் வட்டாரங்கள் கூறுகின்றன.