ஸ்ரீநகரில் கண்டதும் சுட உத்தரவு : காஷ்மீரில் இயல்பு வாழ்க்கை இல்லை

ஸ்ரீநகர் : தொடரும் வன்முறையால், காஷ்மீர் கலவர பூமியாக
காட்சியளிக்கிறது. பாதுகாப்புப் படையினர் நேற்று நடத்திய துப்பாக்கிச்
சூட்டில், மூன்று பேர் பலியாயினர். இதனால், அங்கு பதட்டம்
அதிகரித்துள்ளது. ஊரடங்கு உத்தரவை மீறுவோரை கண்டதும் சுட
உத்தரவிடப்பட்டுள்ளது.
காஷ்மீரில் செயல்படும் பிரிவினைவாத அமைப்புகள், பாதுகாப்புப்
படையினருக்கு எதிராக தொடர்ந்து போராட்டங்களை நடத்துகின்றனர். இதனால்,
பாதுகாப்புப் படையினருக்கும், போராட்டக்காரர்களுக்கும் இடையே, கடந்த ஒரு
மாதமாக மோதல் நடக்கிறது. கலவரத்தை கட்டுப்படுத்த, பாதுகாப்புப் படையினர்
துப்பாக்கிச் சூடு நடத்துகின்றனர். இந்த கலவரம் சில நாட்களுக்கு முன்
தற்காலிகமாக ஓய்ந்திருந்தது. ஆனாலும், கடந்த 30ம் தேதி முதல் மீண்டும்
கலவரம் வெடித்தது. பாதுகாப்புப் படையினர் மீது கல்வீச்சு, அரசு
அலுவலகங்கள் சூறை, தீ வைப்பு, துப்பாக்கிச் சூடு சம்பவங்களால், காஷ்மீர்
கலவர பூமியாக மாறிவிட்டது.
மூன்று பேர் பலி: ஸ்ரீநகரின் பல இடங்களில் நேற்று ஊரடங்கு
உத்தரவையும் மீறி, போராட்டக்காரர்கள் வீதிக்கு வந்து, பாதுகாப்புப்
படையினர் மீது கற்களை வீசி தாக்கினர். இதனால், இரு தரப்புக்கும் இடையே
மோதல் வெடித்தது. கமர்வாரி என்ற இடத்தில் பாதுகாப்புப் படையினர்
சுட்டதில், ஒருவர் பலியானார். இதேபோல், இதிகா என்ற இடத்திலும் வன்முறை
வெடித்தது. இங்கு நடந்த துப்பாக்கிச் சூட்டில் அனிஸ் குர்ஷித் என்பவர்
பலியானார். துப்பாக்கிச் சூட்டில் படுகாயமடைந்த ரியாஸ் அகமது என்பவர்,
மருத்துவமனையில் உயிரிழந்தார். கடந்த 30ம் தேதியிலிருந்து, இதுவரை 24 பேர்
பலியாகியுள்ளனர். இதையடுத்து, காஷ்மீரின் பெரும்பாலான இடங்களில் பதட்டம்
நீடிக்கிறது. ஊரடங்கு உத்தரவு அமலில் இருப்பதாலும், வன்முறை
ஏற்பட்டுள்ளதாலும் பொதுமக்களின் இயல்பு வாழ்க்கை முடங்கியுள்ளது. பல
நெடுஞ்சாலைகளில் சாலை மறியல் போராட்டம் நடத்தப்பட்டது. வாகன போக்குவரத்து
அடியோடு முடக்கப்பட்டது.
சுட உத்தரவு: வன்முறை தொடர்வதால், ஊரடங்கு உத்தரவை மீறுவோரை
கண்டதும் சுட, உத்தரவிடப்பட்டுள்ளது. இதுகுறித்து ஸ்ரீநகரில்,
பாதுகாப்புப் படையினர் வாகனங்களில் சென்று ஒலிபெருக்கி மூலம்
பொதுமக்களுக்கு அறிவித்தனர். கலவர பீதி காரணமாக ஸ்ரீநகரில் இருந்த
நூற்றுக்கும் மேற்பட்ட ரயில்வே ஊழியர்கள், ஜம்முவுக்கு இடம்
பெயர்ந்துள்ளனர். இதற்கிடையே, ரஜோரி மாவட்டத்தில் பாதுகாப்புப் படையினர்
நடத்திய சோதனையில், பயங்கரவாதிகள் மறைவிடம் ஒன்று கண்டுபிடிக்கப்பட்டது.
இங்கிருந்த ஏராளமான வெடி குண்டுகள் மற்றும் வெடி பொருட்களை பாதுகாப்புப்
படையினர் கைப்பற்றினர்.
ஜம்மு - காஷ்மீர் பகுதியில் இருந்து காஷ்மீர் பள்ளத்தாக்குக்கு யாராவது
வர வேண்டும் என்றால், அது அவ்வளவு சுலபம் அல்ல; அதிக கட்டணம் கொடுத்து
தனியார் வாகனங்களை பிடித்து செல்ல வேண்டும். அதிக இடங்களில் மோதல்
இருப்பதால், தெருக்களில் தடைகளாக, கவச வாகனங்கள், போலீசார் துப்பாக்கி
சகிதமாக ரோந்து ஆகியவை காணப்படும். இதைத் தவிர தெருக்களில் சுருள் கம்பித்
தடைகள் போடப்பட்டிருக்கின்றன. வடக்கு காஷ்மீரில் உள்ள குப்வாரா,
சுல்தான்புரா போன்ற நகரங்கள் மட்டும் அல்ல, தெற்கு காஷ்மீரிலும் மோசமான
நிலை நீடிக்கிறது. கடைகள் திறக்கப்படாததால் அத்தியாவசியப் பொருட்களுக்கும்
தட்டுப்பாடு இருக்கிறது.
துணை ராணுவப் படை குவிக்கப்பட்ட இச்சூழ்நிலையில், நேற்று மிதவாத
இயக்கமான ஹுரியத் தலைவரான மிர்வாயிஸ், ஒமர் பரூக் விடுத்த வேண்டுகோளின்
படி, பாதுகாப்புப் படையினருக்கு எதிராக கல்வீச்சும் இல்லை, கடந்த
ஒருவாரமாக பாகிஸ்தான் ஆதரவு கோஷம் எழுப்பி போராட்டம் செய்ததை மாற்றிக்
கொண்டனர். மாறாக "காஷ்மீருக்கு சுதந்திரம்' தேவை என்று மட்டும் கோஷம்
எழுப்பினர்.
ஐ.நா., மறுப்பு: ஐ.நா., பொதுச் செயலர் பான்-கீ-மூனின் செய்தி
தொடர்பாளரும், பாகிஸ்தான் வம்சாவளியைச் சேர்ந்தவருமான பர்கான் ஹக் என்பவர்
கடந்த வாரம் கூறுகையில், "பத்திரிகையாளர் சந்திப்பின்போது பொதுச் செயலர்
பான்-கீ-மூன், காஷ்மீர் நிலவரம் குறித்து கவலை தெரிவித்தார். பிரச்னைக்கு
அமைதியான வழியில் தீர்வு காண வேண்டும் என்றும் வலியுறுத்தினார்' என்றார்.
இது, இந்தியாவில் பெரும் சர்ச்சையை ஏற்படுத்தியது.
இதுகுறித்து மத்திய வெளியுறவு அமைச்சகம் வெளியிட்டுள்ள அறிக்கை: ஐ.நா.,
பொதுச் செயலரின் செய்தி தொடர்பாளர் கூறியது குறித்து, ஐ.நா., அலுவலகத்தில்
விளக்கம் கேட்கப்பட்டது. அப்போது அவர்கள், பத்திரிகையாளர் சந்திப்பின்போது
காஷ்மீர் விவகாரம் பற்றிய எந்த கேள்வியும் எழவில்லை என்றும், அதுகுறித்து
பொதுச் செயலர் எந்த கருத்தையும் தெரிவிக்கவில்லை என்றும் விளக்கம்
அளித்தனர். இவ்வாறு அந்த அறிக்கையில் தெரிவிக்கப்பட்டுள்ளது.