மக்களவை முன்னாள் சபாநாயகர் பி.ஏ.சங்மா மறைவு

மக்களவை முன்னாள் சபாநாயகர் பி.ஏ.சங்மா மாரடைப்பால் இன்று (வெள்ளிக்கிழமை) காலமானார். அவருக்கு வயது 68. அவரது மறைவை மக்களவையில் சபாநாயகர் சுமித்ரா மகாஜன் அறிவித்தார்.

இதனையடுத்து மறைந்த முன்னாள் சபாநாயகருக்கு மரியாதை செலுத்தும் வகையில் மக்களவை நாள் முழுவதும் ஒத்திவைக்கப்பட்டது.


சங்மாவுக்கு புகழஞ்சலி:

சங்மா மறைவை அறிவித்த சுமித்ரா மகாஜன், “அவையை புன்னகையுடன் சுமுகமாக நடத்துவது எப்படி என்பதை சங்மாவிடமே நான் கற்றுக் கொண்டேன். ஒடுக்கப்பட்ட சமூகத்தினரின் மேம்பாட்டுக்காக சங்மா அயராது உழைத்தவர். மக்களால் போற்றப்பட்ட தலைவர் அவர்” என புகழஞ்சலி செலுத்தினார்.

பிரதமர் இரங்கல்:



சங்மா மறைவுக்கு இரங்கல் தெரிவித்த பிரதமர் நரேந்திர மோடி, “வடகிழக்கு மாநிலங்களின் மேம்பாட்டுக்காக சங்மா ஆற்றிய தொண்டுகள் அதி முக்கியத்துவம் வாய்ந்தவை. மக்களவை சபாநாயகராக அவரது பணியினை மறக்க முடியாது. அவர் மிகவும் எளிமையானவர், பழகுவதற்கு இனிமையானவர், நேதாஜியின் கொள்கைகளால் ஈர்க்கப்பட்டவர். அவரது மறைவு ஆழ்ந்த துயரத்தை அளிக்கிறது” என்றார்.

சங்மா சிறு குறிப்பு:

பி.ஏ.சங்மா (புர்னோ அகிடோக் சங்மா) 1947-ல் செப்டம்பர் 1-ம் தேதி மேகாலாயாவில் பிறந்தார். சட்டம் பயின்றார். 9 முறை மக்களவை உறுப்பினராக தேர்ந்தெடுக்கப்பட்டார். 11-வது மக்களவையின் சபாநாயகராக இருந்தார்.

இவர் 2012ல் நடைபெற்ற குடியரசுத் தலைவர் பதவிக்கும் போட்டியிட்டார். இப்போட்டியில் ஏற்பட்ட தோல்வியைத் தொடர்ந்து தனது ஆதரவாளர்களைக்கொண்டு தேசிய மக்கள் கட்சியைத் தொடங்கினார். மறைந்த சங்மாவின் மகள் அகதா சங்மா தற்போது எம்.பியாக உள்ளார்.
–
தமிழ் தி இந்து காம்