அரசு கல்லூரியில் சேர எஸ்.வி.எஸ். கல்லூரி மாணவர்களுக்கு கலந்தாய்வு

அரசு கல்லூரியில் சேர எஸ்.வி.எஸ். கல்லூரி மாணவர்களுக்கு கலந்தாய்வு

கள்ளக்குறிச்சி அருகே உள்ள எஸ்.வி.எஸ். இயற்கை மருத்துவ கல்லூரி 3 மாணவிகள் மர்மமான முறையில் இறந்து கிடந்த சம்பவம் நாடு முழுவதும் பெரும் பரபரப்பை ஏற்படுத்தியது.

இது தொடர்பாக அக்கல்லூரியின் தாளாளர் கைது செய்யப்பட்டார். கல்லூரி மூடப்பட்டுள்ளது. அக்கல்லூரியில் படித்த மாணவர்களின் கல்வி பாதிக்கப்படாத வகையில் அரசு கல்லூரியில் சேர்க்கப்படுவார்கள் என்று முதல்– அமைச்சர் ஜெயலலிதா அறிவித்தார்.

அதன்படி அந்த கல்லூரியில் 2008 முதல் 2016 வரை படித்து வரும் மாணவர்கள். தேர்ச்சி பெறாத மாணவர்கள் விவரங்கள் சேகரிக்கப்பட்டது. தமிழ்நாடு எம்.ஜி.ஆர். மருத்துவ பல்கலைக்கழக துணைவேந்தர் டாக்டர் கீதாலட்சுமி மற்றும் அதிகாரிகள் ஆய்வு நடத்தி மாணவர்களை சென்னை அரும்பாக்கத்தில் உள்ள இயற்கை மருத்துவ கல்லூரியில் சேர்க்க நடவடிக்கை மேற்கொள்ளப்பட்டது.

அதில் எஸ்.வி.எஸ். கல்லூரியில் படித்த 136 மாணவ–மாணவிகள் அரசு கல்லூரியில் சேர தகுதி உடையவர்களாக தேர்வு செய்யப்பட்டனர்.

டாக்டர் எம்.ஜி.ஆர். மருத்துவ பல்கலைகழகத்தில் பதிவு பெற்ற இவர்களுக்கு கலந்தாய்வு மூலம் இடங்கள் ஒதுக்க ஏற்பாடு செய்யப்பட்டது.

அதன்படி அரும்பாக்கத்தில் இன்று அந்த மாணவர்களுக்கு அரசு கல்லூரியில் சேருவதற்கான கலந்தாய்வு நடைப்பெற்றது. அரசு இயற்கை மருத்துவ கல்லூரியின் தேர்வு குழுவினர் மாணவர்களின் சான்றிதழ்களை ஆய்வு செய்து அனுமதி கடிதம் வழங்கினர். சித்தா மற்றும் இயற்கை மருத்துவ படிப்பு மாணவர்கள் மட்டும் அரசு கல்லூரியில் சேர அனுமதிக்கப்பட்டுள்ளனர்.

எஸ்.வி.எஸ். கல்லூரியில் ஒமியோபதி மருத்துவ படிப்பு படித்த மாணவர்களுக்கு மத்திய அரசின் அனுமதி பெற்றுதான் மாற்று ஏற்பாடு செய்ய வேண்டும். இதற்காக மத்திய அரசுக்கு எம்.ஜி.ஆர். மருத்துவ பல்கலைக்கழகம் கடிதம் எழுதியுள்ளது. அங்கிருந்து பதில் வந்த பிறகுதான் அவர்கள் எந்த கல்லூரியில் சேர்ந்து படிப்பார்கள் என்று தெரியவரும்.

இன்றைய கலந்தாய்வில் 136 மாணவ–மாணவிகளுக்கு அரசு கல்லூரியில் சேர அனுமதி அளிக்கப்பட்டது.