அம்பேத்கர் பிறந்தநாள் விழா: மாயாவதி, ராகுல் இடையே போட்டா போட்டி

by **piraba** Thu Apr 15, 2010 6:15 am

லக்னோ
: 'தலித் தலைவர்களின் சிலைகளை நிறுவி, அவர்களைப் பெருமைப்படுத்துவதற்காக
எந்த விலையும் கொடுக்க நான் தயாராக இருக்கிறேன்' என்று, உத்தரபிரதேச
முதல்வர் மாயாவதி ஆவேசமாகக் கூறியுள்ளார். திட்டமிட்டபடி காங்., பொதுச்
செயலர் ராகுல், அம்பேத்கர் சிலைக்கு மாலையணிவிக்க முடியவில்லை. அவரும்
மாயாவதி அரசின் செயல் திட்டங்களை விமர்சித்தார்.

சட்டமேதை அம்பேத்கரின் 119வது பிறந்த
நாளையொட்டி, காங்கிரஸ் கட்சி, தலித்களின் ஓட்டுகளை கவரும் விதத்தில்
ராகுல் தலைமையிலான ரதயாத்திரைத் துவக்க விழாவுக்கு ஏற்பாடு செய்திருந்தது.
'தலித்களின் நலனில் காங்கிரஸ் அக்கறை கொள்ளவில்லை; ஐக்கிய முற்போக்கு
கூட்டணி அரசு தவறான பொருளாதாரக் கொள்கைகளை மேற்கொண்டு வருகிறது' என்று
குற்றம்சாட்டி பகுஜன் சமாஜ் கட்சி ஆர்ப்பாட்டமும் நடத்த
திட்டமிட்டிருந்தது. இந்த இரண்டு நிகழ்ச்சிகளுமே, தலித்கள் கணிசமாக வாழும்
அம்பேத்கர் நகரில் தான் நடந்தன.

இரு நிகழ்ச்சிகள் நடக்கும் இடங்களுக்கு
இடையில், 'அம்பேத்கர் சமாஜிக் பரிவர்த்தன் ஸ்தல்' என்ற இடத்தில்
அம்பேத்கர் சிலை அமைந்துள்ளது. இச்சிலைக்கு யார் முதலில் மாலை அணிவிப்பது
என்று இரு கட்சிகளுக்கும் இடையே போட்டி நிலவியது. இந்த இடம் மாயாவதி
தொடர்ந்து ஜெயித்த தொகுதிக்குள் அமைந்த இடம். ராகுலின் நிகழ்ச்சி காலை 10
முதல் மதியம் 2 மணி வரையிலும், பகுஜன் சமான் கட்சியின் நிகழ்ச்சி காலை 10
முதல் மாலை 4 மணி வரையிலும் நடந்தன. இந்நிலையில் நேற்று காலை முதல் ஆளாக,
முதல்வர் மாயாவதி, அங்குள்ள அம்பேத்கர் சிலைக்கு மாலையணிவித்து, மரியாதை
செலுத்தினார்.

பின்பு அவர் கூறியதாவது:
காங்கிரஸ் இந்த நாட்டை 50 ஆண்டுகளும், உ.பி.,யை 38 ஆண்டுகளும் ஆட்சி
செய்துள்ளது. ஆனால் தலித்களின் நலனுக்காக ஒன்றும் செய்யவில்லை. பகுஜன்
சமாஜ், தலித் தலைவர்களைப் பெருமைப்படுத்தும் விதத்தில் அவர்களுக்கு
சிலைகள் வைக்க முன்வந்தால், தலித்களுக்கு எதிரான சில சக்திகள் அதை
எதிர்க்கின்றன. தலித் சமூகத்தின் மாபெரும் தலைவர்களைப்
பெருமைப்படுத்துவதில் மாநில அரசு பின்வாங்காது. பகுஜன் கட்சியின்
நெருக்கடியால் தான், காங்கிரஸ் அம்பேத்கருக்கு 1990ல் பாரத ரத்னா விருது
கொடுத்தது. காங்கிரசோ, பா.ஜ.,வோ அல்லது பிற எதிர்க்கட்சிகளோ தலித்களுக்காக
ஒன்றும் செய்யவில்லை. இவ்வாறு மாயாவதி தெரிவித்தார். அங்கிருந்து
புறப்படும் முன், அம்பேத்கர் சிலை இருந்த இடத்தை ஹெலிகாப்டரிலேயே அவர்
வலம் வந்தார். அங்கு நடந்த ஆர்ப்பாட்டத்தில் 50 ஆயிரம் கட்சித் தொண்டர்கள்
கலந்து கொண்டனர்.

ராகுலின் ரத யாத்திரை துவக்கம்:
பகுஜன் சமாஜ் கட்சி ஆர்ப்பாட்டம் நடத்திய அதே அம்பேத்கர் நகரின் மற்றொரு
புறத்தில், காங்கிரஸ் பொதுச் செயலர் ராகுலின், 'விழிப்புணர்வு ரத
யாத்திரை'க்கான துவக்கவிழா நடந்தது. அங்கு, அம்பேத்கர் படத்திற்கு
மாலையணிவித்து, நிகழ்ச்சியைத் துவக்கி வைத்த ராகுல், பகுஜன் சமாஜ்
கட்சியைக் கடுமையாகத் தாக்கிப் பேசினார். அவர் பேசியதாவது: மத்திய அரசு
தேசிய ஊரக வேலைவாய்ப்புத் திட்டம், கல்வி அடிப்படை உரிமை, சர்வ சிக்சா
அபியான், நல்வாழ்வு ஆகியவற்றுக்காக நிதியுதவி அளித்து வருகிறது. ஆனால்,
மாநில அரசு இத்திட்டங்கள் பயனற்றவை என்று கூறுகிறது. திட்டங்களுக்கான
நிதியுதவி லக்னோவை வந்தடைந்த பின்னும் கூட, அம்பேத்கர் நகர் உள்ளிட்ட பல
மாவட்டங்கள் வளர்ச்சி அடையவில்லை. ஒதுக்கப்படும் நிதி எங்கே போகிறது என்று
யாருக்கும் தெரியவில்லை. ஏழைகளின் அரசு இது என்றால் இங்குள்ள ஏழை மக்கள்
எதற்காக மும்பை போன்ற நகரங்களை நோக்கிச் செல்கின்றனர்? பண்டல்கண்ட் பகுதி
வளர்ச்சிக்காக கோடிக்கணக்கில் மத்திய அரசு நிதி அளித்துள்ளது. ஆனால் அங்கு
ஒரு முன்னேற்றத்தையும் காண முடியவில்லை. இவ்வாறு ராகுல் பேசினார்.

'அம்பேத்கர் சிலைக்கு ராகுல்,
மாலையணிவிப்பதற்கு மாவட்ட நிர்வாகம் அனுமதியளிக்க மறுத்துவிட்டது. அனுமதி
அளிக்கக் கோரி நாங்கள் முன்பே கடிதம் கொடுத்த பின்பும் கூட போலீசார்
எங்களுக்கு அனுமதி மறுத்தனர்' என்று காங்., தலைவர் திவாரி கூறினார்.
ஆனால், இத்தகவலை மறுத்த மாவட்ட கலெக்டர், 'பகுஜன் சமாஜ் கட்சியினரின்
கூட்டம் முடிந்த பின், ராகுல் மாலையணிவிக்கலாம் என்று தான் அனுமதி
அளித்திருந்தோம்' என்று விளக்கினார். காங்கிரஸ் செய்தித் தொடர்பாளர் ஷகீல்
அகமது டில்லியில் பத்திரிகையாளர்களுக்கு அளித்த பேட்டியில், 'இது
துரதிர்ஷ்டவசமானது. எந்தவொரு தேசியத் தலைவரின் அறிவுரைகளுக்கும்,
நினைவுகளுக்கும் யாரும் தனிப்பட்ட உரிமை கொண்டாட முடியாது' என்று
தெரிவித்தார்.