ஆப்பிள்களில் மெழுகு பூசுவதால் உடல் நலத்திற்கு பாதிப்பா?

சென்னை
: 'வெளிநாடுகளிலிருந்து, இறக்குமதியாகும் ஆப்பிள்களில் உள்ள மெழுகு
பூச்சு, உடல் நலத்தை பாதிக்காது' என ஆப்பிள் இறக்குமதியில் ஈடுபட்டுள்ள,
'வாஷிங்டன் ஆப்பிள் கமிஷன்' தெரிவித்துள்ளது.

இந்தியாவைப் பொறுத்தவரை காஷ்மீர், சிம்லா,
டார்ஜிலிங், நைனிட்டால், ஊட்டி, கொடைக்கானல் உள்ளிட்ட பகுதிகளில்
விளைவிக்கப்படும் ஆப்பிளுக்கு மவுசு அதிகம். இவற்றைப் பெட்டிகளில்
பதப்படுத்தி நாடு முழுவதும் விற்பனைக்கு அனுப்பப்படுகிறது. நம்நாட்டின்
தட்பவெப்பநிலையைப் பொறுத்து அதிகபட்சம், இந்த ஆப்பிள்களை ஒரு மாதம்
வரையிலும் கெடாமல் பாதுகாக்க முடியும். 'ஐஸ் பிரீசர்' எனப்படும் குளிர்
பதனிடும் கிடங்குகளில் வைத்தால் இரண்டு மாதங்கள் வரை கெடாமல் பாதுகாக்க
முடியும். இந்தியாவில் ஆப்பிள் சீசன் ஆகஸ்ட் மாதத்தில் தொடங்கி அக்டோபர்
மாதம் வரை குறுகிய காலத்திற்கு மட்டுமே உள்ளது.

இதனால் அமெரிக்கா, சிலி, சீனா, ஆஸ்திரேலியா
உள்ளிட்ட நாடுகளிலிருந்து இறக்குமதியாகும் ஆப்பிள்களை வாங்குவதற்கு
வியாபாரிகள் அதிகம் ஆர்வம் காட்டி வருகின்றனர். இந்த இறக்குமதி ஆப்பிள்கள்
வருடம் முழுவதும் கிடைப்பதால் வியாபாரிகள் விரும்பி வாங்குகின்றனர். இந்த
ஆப்பிள்கள் கெடாமல் பாதுகாக்கவும், ஆப்பிள்களின் நிறம் மாறாமல் இருக்கவும்
மெழுகு பூச்சு பூசப்படுகிறது. இந்த வகை இறக்குமதி ஆப்பிள்களை சாப்பிடுவது
உடல் நலத்திற்கு கேடு விளைவிக்கும் என்று சமீபத்தில் செய்திகள்
வெளியானது.இத்தகவலை, 'வாஷிங்டன் ஆப்பிள் கமிஷன்' மறுத்துள்ளது.

அந்நிறுவனம் வெளியிட்டுள்ள அறிவிப்பு:இறக்குமதி
செய்யப்படும் ஆப்பிள்களில் அதன் இயற்கையான தன்மை மற்றும் தரம் மாறாமல்
இருக்க மெழுகுப் பூச்சு செய்யப்படுகிறது. இந்த மெழுகுகள், பனை மரத்தின்
இலைகளிலிருந்து பெறப்படும், 'கார்நவ்பா' வகை மெழுகு, தேனீக்களிடமிருந்து
பெறப்படும், 'செல்லாக்' வகை மெழுகு என இயற்கையான முறையில் பெறப்படுகிறது.
இவை இரண்டும், 'எடிபிள்' எனப்படும் சாப்பிடக் கூடிய மெழுகு வகைகள். உலக
சுகாதார மையத்தினால் இந்த வகை மெழுகுகள் அங்கீகரிக்கப்பட்டுள்ளன.
'எடிபிள்' மெழுகு பூச்சு கொண்ட சாக்லெட் மற்றும் ஆப்பிள்கள் நீண்ட காலமாக
புழக்கத்தில் உள்ளன.

அமெரிக்காவிலிருந்து இறக்குமதி செய்யப்படும்
ஆப்பிள்கள், இந்திய குடும்ப நலத்துறை அமைச்சகத்தால் அங்கீகரிக்கப்பட்டு,
மக்கள் பயன்பாட்டில் உள்ளது. ஆப்பிள்களில் பூசப்படும் மெழுகு, அந்த
ஆப்பிள்களின் புதிய தன்மை மாறாமல் இருப்பதற்கு பூசப்படுகிறது. இந்த வகை
மெழுகுகள் உடல் நலத்திற்கு தீங்கு ஏற்படுத்தாது. பலதரப்பட்ட
ஆராய்ச்சிகளுக்கு உட்படுத்தப்பட்ட பிறகே, 'எடிபிள்' வகை மெழுகுகள்
உபயோகப்படுத்தப்படுகின்றன. பொதுமக்கள் இந்த வகை ஆப்பிள்களை வாங்கி
சாப்பிடுவதால் எந்த வகை தீங்கும் ஏற்படாது.இவ்வாறு 'வாஷிங்டன் ஆப்பிள்
கமிஷன்' தெரிவித்துள்ளது.