கரிகாலன்,பிரபாகரன் சொல்லி இரசித்தவற்றை நாமும் இரசிப்போமா?

கரிகாலன்,பிரபாகரன் சொல்லி இரசித்தவற்றை நாமும் இரசிப்போமா?

மதிய இடைவேளை,என்ன செய்யலாம் என்ற போது, தர நான் நினைத்தது இந்த உணவு.

தமிழர்களின் குரலை உலகெங்கும் ஓங்கி ஒலித்தவன் பிரபாகரன் என்ற மனிதன். நாம் எந்த மதத்திற்கோ, இனத்திற்கோ எதிரிகளோ அல்லது விரோதிகளோ அல்லர் என்று ஆரம்ப காலத்தில் கூறிய வார்த்தைகளை இறுதி யுத்தம் வரை காப்பாற்றி,மக்கள் எவரையும் ஆயுதங்களுக்கு இரையாக்காத பெருமை அவரையே சேரும். நாளொரு கொள்கையும், பேச்சும்,அறிக்கையும் என அரசியல் நடத்தும் இன்றைய நாளில், என்றும் ஒரே பேச்சாக இருந்து காட்டி வருபவர் இந்த மனிதர்.அந்த மனிதன் சொல்லி இரசித்த வரிகளை,சொல்லி இரசித்தவர்கள், பாலா அண்ணா என ஈழத் தமிழர்களால் அழைக்கப்பட்ட அன்ரன் பாலசிங்கமும்,தமிழ்செல்வனும்.

பிரபாகரன் சொல்லி கரிகாலன் இரசித்த சிலவற்றை நாமும் இரசிக்கலாமே.சிறு வயதில் கைக்குண்டு தயாரிக்கும் போது காலில் ஏற்பட்ட காயத்தினால் ஏற்பட்ட கரிய வடு காரணமாக, அவருக்கு கரிகாலன் என்ற பெயரை நண்பர்கள் கொடுத்தார்கள்.

பயம் என்பது பலவீனத்தின் வெளிப்பாடு.
கோழைத்தனத்தின் தோழன்.
உறுதியின் எதிரி.
மனித பயங்களுக்கெல்லாம் மூலமானது மரண பயம்.

பரிதாபத்திற்கு உரியவர்களாய் வாழ்வதா?
வேண்டவே வேண்டாம்.

இயற்கை எனது நண்பன்,
வாழ்க்கை எனது தத்துவாசிரியன்,
வரலாறு எனது வழிகாட்டி

கேட்டு இரசித்தவர்களை குத்திக் காட்டி,அதிகமாக பேசாதீர்கள் அதை செயலில் காட்டுங்கள்,
என்று சொன்னவுடன் பேச்சை குறைத்துக் கொண்டு, செயலில் காட்டுவோம் என்றார்களாம் பாலாவும்,தமிழ்செல்வனும்.

நான் உண்மையானவன் அல்லன் என்று ஒரு குண்டைப் போட்டாராம் தேசியத் தலைவர். அடுத்த கணமே, ஒரு இலட்சியத்திற்காக தன் உயிரைக் கொடுப்பவன் தான் உண்மையானவன். நான் இலட்சியத்திற்காக என் உயிரைக் கொடுக்காத வரை உண்மையானவன் அல்லன் என்றாராம்.

வெற்றிகளை மாவீரர்களுக்கு கொடுங்கள்.தோல்விகளை நாங்கள் வைத்திருப்போம்.
தோல்வி கண்ட தாகுதல்களின் போதெல்லாம் சொல்லி அமைதிப் படுத்தினாராம்.

இது 1981 ல் தமிழன் பிரபாகரன் தந்த புதுக் கவிதை.

நாம் தமிழ் ஈழப் படைவீரர்கள்!
நாம் அணிவகுத்துள்ளோம்
இழந்த எமது நாட்டை மீட்க

எதிரி நமது நாட்டை
வஞ்சகமாக அபகரித்துவிட்டான்!
அதைக் கண்டு நாம் அஞ்சவில்லை!

புயலெனச் சீறி
இழந்த நாட்டை மீட்க
நாம் அணிவகுத்துள்ளோம்
நாம் தமிழ் ஈழப் படைவீரர்கள்!

எமது படையணி கடக்க வேண்டியது
நெருப்பாறென்பது எமக்குத் தெரியும்
ஆனால்...
அதைத் தாங்கக் கூடிய
மக்கள் ஆதரவென்னும்
கவசம் எம்மிடம் உண்டு!

எதிரியின் ஆயுதமோ பலம் பொருந்தியது!
எமது
ஆத்ம பலமோ அதைவிட
வலிமை வாய்ந்தது!
எதிரியின் குண்டுகள் வெடிக்கும்...
ஆனால்
எமது விடுதலை நெஞ்சங்கள்
எரிமலையென வெடிக்கும் சத்தத்தில்
அதன் சத்தம் அமுங்கிவிடும்!

நாம் அணிவகுத்துள்ளோம்...
நாம் தமிழ் ஈழப் படைவீரர்கள்!
எமது அணிவகுப்பு
எமது தமிழ்ஈழ மக்களிடையே
அணிவகுத்துச் செல்கிறது!

நாம் செல்லும் இடமெல்லாம்...
எமது எதிரிகள் அஞ்சி ஓடுகிறார்கள்!
மக்களிடத்தில் உள்ள
பிரதேசம் சாதி
மதமென்னும் பேய்களும்
அலறி ஓடுகின்றன...

எமது படையணி விரைகிறது...
எம தேசத்தை மீட்க!

நாம் செல்லும் இடமெல்லாம்...
காடுகள் கழனிகள் ஆகின்றன!
வெட்டிப் பேச்சு வீரர்கள்
மிரண்டோடுகின்றனர்...!

உழைப்போர் முகங்களில்
உவகை தெரிகிறது
ஏழைகள் முகங்களில்
புன்னகை உதயமாகிறது.

போராட்டத்தின் வடிவங்கள் மாறலாம், ஆனால் போராட்ட இலட்சியம் மாறாது.

தன் தளபதிகளை பெருமையுடன்,வீரமுடன் களத்தில் நிறுத்தி, மற்றவர் போற்ற வைத்து, தன்னைப் பின் நிறுத்தி,தன்னைத் தாழ்த்தி வாழ்ந்து கொண்டிருப்பவன் மறத் தமிழன் பிரபாகரன்.

ஆனால் தங்களை உயர்த்திக் கொண்டு வாழ்பவர்கள் இன்று எத்தனை பேர் என்பது உங்களுக்கே தெரியும்.டெசோ மாநாட்டில் ஐயா கருணா நிதியின் பேச்சை கவனித்தால்,பேச்சின் பல பகுதி தன்னை உயர்த்தி பேசியதுதான்.
தமிழ் இன்று செந்தமிழ். ஆனால் இந்த தமிழை செந்தமிழாக அறிவிக்க வேண்டும் என்று தன் குரலால் வெளியிட்டவர்,செந்தமிழ் மாநாடு நடத்திய கருணாநிதி அல்ல. ஒரு தமிழ் அறிந்த வெளிநாட்டு அறிஞரே.

என்ன செய்வது,சொல்வதை எல்லாம் கேட்டு தலை ஆட்டும் ரொபோட்டோக்களாக நாம் மாறி விட்டோமே. சுதந்திர போராட்ட காலங்களிலும் ஏன் இந்திரா காந்தியின் ஆட்சி காலத்திலும் கூட எதிர்த்துப் போர்க்கொடி தூக்கிய ஊடகங்கள் இன்று பணத்திற்காக வாய் மூடி நிற்கின்றனவே,வெட்கமாக இருக்கிறது. ஜனநாயகத்தின் மூன்று தூண்களில் ஒன்றான ஊடகம் ஜனநாயகத்திற்கு ஒரு தூணாய் நிற்காது காலை தூக்குவது விழப் போகும் ஜனநாயகத்திற்கும்,தூக்கி நிறுத்தப் போகும் சர்வாதிகாரத்திற்கும் துணை போய் விடாதா?

சக்தி.

உண்மை உண்மை முற்றிலும் உண்மை