உலகத் தமிழர் பேரவை மாநாட்டில் மிலிபாண்ட பங்கேற்பது சிறிலங்காவுக்கு

உலகத்
தமிழர் பேரவையின் முதலாவது அதிகாரபூர்வ தொடக்க மாநாட்டுக்காக வருகை
தந்திருந்த புலம் பெயர் தமிழர் பிரதிநிதிகளை பிரித்தானிய நாடாளுமன்றத்
தொகுதியில் அந்த நாட்டு வெளிவிவகார அமைச்சர் டேவிட் மிலிபொண்ட் இன்று
சந்தித்தார்.
இதன் மூலம் சிறிலங்காவிற்கும் பிரித்தானியாவிற்கும் இடையிலான உறவு
புதிய மோசமான கட்டத்தை அடைந்துள்ளது என பிரித்தானியாவின் Times Online
தெரிவித்துள்ளது.
உலகத் தமிழர் பேரவையின் தொடக்க மாநாட்டையும் மிலிபொண்ட் தொடக்கி
வைத்துப் பேசினார். பிரித்தானிய நிழல் வெளிவிவகார அமைச்சர் வில்லியம் ஹேக்
அந்தக் கூட்டத்தை முடித்து வைத்து உரையாற்றினார்.
பிரித்தானிய நாடாளுமன்ற உறுப்பினர்கள் பலரும் கட்சி பேதங்களுக்கு அப்பால் நிகழ்வில் கலந்து கொண்டிருந்தனர்.

கடந்த
வருடம் விடுதலைப் புலிகள் தோற்கடிக்கப்பட்டதன் பின்னர் சிறிலங்காத்
தமிழர்களுக்கு பிரித்தானிய அரசியல் கட்சிகள் முன்னெப்போதும் இல்லாதவாறு
ஆதரவு வழங்குவதை இது காட்டுவதாக Times Online கூறுகின்றது.

“இது எங்களுக்கு மிகச் சிறந்த ஆதரவு” என்றார் உலகத் தமிழர் பேரவையின் எஸ்.ஜே.இமானுவல்.
“உலகில் உள்ள வேறு எந்த நாட்டையும் விட பிரித்தானிய அரசுக்கு எமது
வரலாறு பற்றித் தெரியும், எமது நிலைமைகளைப் புரிந்து கொள்வதற்கு அது
போதுமானது” என்கிறார் அவர்.
தமது பேரவை வன்முறைகளற்ற ரீதியில் வழிநடத்தப்படும்; சிறிலங்காப்
பொருட்களைப் புறக்கணிக்கும் போராட்டத்தை முன்னெடுக்கும்; குடியரசு
அதிபர் மகிந்த ராஜபக்ச, பாதுகாப்புச் செயலாளர் கோத்தபாய ராஜபக்ச,
முன்னாள் படைத் தளபதி சரத் பொன்சேகா ஆகியோருக்கு எதிராக போர்க்
குற்றசாட்டுக்களைக் கொண்டு வரும் என்று இமானுவேல் கூறினார்.

பேரவையில்
உள்ள பல அமைப்புக்கள் - குறிப்பாக பிரித்தானிய தமிழர் பேரவை - விடுதலைப்
புலிகளின் முன்னணி நிறுவனங்கள் என்று சிறிலங்கா அரசு கூறிவரும் நிலையில்,
பிரித்தானியாவின் இந்த நடவடிக்கை நிச்சயமாக சிறிலங்கா அரசுக்குச்
சினமூட்டும்.
பிரித்தானியா விடுதலைப் புலிகளுக்கு இரகசியமாக உதவி வருவதாக சிறிலங்கா அதிகாரிகள் நீண்ட காலமாகவே குற்றஞ்சாட்டி வருகிறார்கள்.
இருப்பினும் பேரவையின் தொடக்க மாநாட்டில் மிலிபொண்ட் உரையாற்றியதை பிரித்தானிய வெளிவிவகாரத் துறை நியாயப்படுத்துகிறது.
“சிறிலங்காவில் நிலைத்திருக்கக் கூடிய அமைதியை ஏற்படுத்துவதற்கு
இனங்களுக்கு இடையில் உண்மையான தேசிய கருத்து இணக்கப்பாடு காணப்படுவதே ஒரே
வழி என்று பிரித்தானியா உறுதியாக நம்புகின்றது.
இந்த இலக்கை அடைவதற்கு முயற்சிக்கும் சிறிலங்காவின் எந்தச்
சமூகத்தினருடனும், அது சிறிலங்காவிற்கு உள்ளே ஆயினும் சரி வெளியே ஆயினும்
சரி, பிரித்தானியா தொடர்பாடல்களைக் கொண்டிருக்கும்” என
வெளிவிவகாரத்துறைப் பேச்சாளர் கூறினார்.
இதற்கிடையில் -

உலகத் தமிழர் பேரவை மாநாட்டில் பங்கேற்கப்
போவதாக பிரித்தானிய வெளிவிவகார அமைச்சர் டேவிட் மில்லிபான்ட்
அறிவித்திருப்பதற்கு சிறிலங்கா அரசாங்கம் கடும் கண்டனம் தெரிவித்துள்ளது.
கொழும்பில் உள்ள பிரித்தானியாவின் பதில் தூதுவரை இன்று காலை வெளிவிவகார
அமைச்சுக்கு அழைத்த சிறிலங்காவின் வெளிவிவகார அமைச்சர் றோகித போகொல்லாகம
இந்தக் கண்டனத்தை நேரில் தெரிவித்தார்.
“உலகத் தமிழர் பேரவையின் மாநாடு சிறிலங்காவில் இருந்து தனி நாட்டை
அமைப்பதற்கான நோக்கத்தைக் கொண்டது. இந்த மாநாட்டில் மில்லிபான்ட்
பங்கேற்பது, பிரித்தானியாவின் - பிரிவினைக்கு எதிரான கொள்கைக்கு முரணானது.
நாடு கடந்த தமிழீழ அரசுடன் உலகத் தமிழர் பேரவை நேரடித் தொடர்புடையது.
இதில் மில்லிபான்ட் பங்கேற்பது சிறிலங்காவின் இறைமைக்கும்,
ஒருமைப்பாட்டுக்கும் பாதிப்பை ஏற்படுத்தும்” என்றும் றோகித போகொல்லாகம
பிரித்தானிய பதில் தூதுவரிடம் தெரிவித்துள்ளார்