சங்கரன்கோவில் இடைத்தேர்தல்: திமுக வேட்பாளர் ஜவஹர் சூரியகுமார்

சென்னை,
பிப். 17: சங்கரன்கோவில் (தனி) சட்டப் பேரவைத் தொகுதி இடைத்தேர்தலில்
திமுக சார்பில் வழக்குரைஞர் ஜவஹர் சூரியகுமார் (41) போட்டியிடுவார் என அக்
கட்சியின் தலைவர் கருணாநிதி வெள்ளிக்கிழமை அறிவித்தார்.வேட்பாளர்
தேர்வுக்கான நேர்காணல் சென்னை அண்ணா அறிவாலயத்தில் வெள்ளிக்கிழமை மாலை
நடந்தது. நேர்காணல் முடிந்த பிறகு வேட்பாளர் பெயர் அறிவிக்கப்பட்டது.அழகிரி,
ஸ்டாலின் என எந்த அணியையும் சாராத பொது வேட்பாளரா என்று கேட்டறிந்த பிறகே
இவரது பெயர் அறிவிக்கப்பட்டதாக கட்சி வட்டாரங்கள் தெரிவிக்கின்றன.ஜவஹர் சூரியகுமார், முன்னாள் மத்திய அமைச்சர் காலஞ்சென்ற எம். அருணாசலத்தின் அண்ணன் மகன் ஆவார். மொத்தம்
41 பேரிடம் நேர்காணல் நடந்தது. இதில் 8 பேர் பெண்கள். ஒவ்வொருவரிடமும்
சொந்த ஊர், எவ்வளவு பணம் செலவு செய்ய முடியும் என்பன போன்ற விவரங்கள்
கேட்கப்பட்டன.கட்சித் தலைவர் கருணாநிதி தலைமையில் நடந்த நேர்காணலில்
பொதுச் செயலாளர் க. அன்பழகன், முதன்மைச் செயலாளர் ஆற்காடு வீராசாமி,
பொருளாளர் மு.க. ஸ்டாலின், தென் மண்டல அமைப்புச் செயலாளர் மு.க. அழகிரி,
துணைப் பொதுச் செயலாளர்கள் துரைமுருகன், சற்குணபாண்டியன், வி.பி. துரைசாமி,
திருநெல்வேலி மாவட்டச் செயலாளர் கருப்பசாமி பாண்டியன் உள்ளிட்டோர் கலந்து
கொண்டனர்.நேர்காணல் முடிந்த பிறகு சங்கரன்கோவில் தொகுதி சார்ந்த கட்சி நிர்வாகிகளுடன் ஆலோசனை நடந்தது.அழகிரி
பேட்டி: வெற்றி வாய்ப்பு பற்றி அழகிரியிடம் கேட்டதற்கு, இந்த
இடைத்தேர்தலில் வெற்றியைப் பெற்று கட்சித் தலைவரிடம் சமர்ப்பிப்போம்
என்றார்.திமுக ஆட்சிக் காலத்தில் செய்த சாதனைகளையும், இப்போதைய
ஆட்சியில் செய்யாமல் விட்டவற்றையும் விளக்கி தேர்தல் பணியாற்றுவோம் என்று
அவர் குறிப்பிட்டார். இந்த இடைத்தேர்தலில் திமுகவுக்கு காங்கிரஸின் ஆதரவு
கிடைக்குமா என்று கேட்டதற்கு, காங்கிரஸ் கூட்டணியில் இருப்பதால்தான் நான்
அமைச்சராக இருக்கிறேன் என்று பதில் அளித்தார்.இத் தொகுதியில் அதிமுக வேட்பாளராக முத்துச்செல்வி ஏற்கெனவே அறிவிக்கப்பட்டுள்ளார்.