நிபுணர் குழு அறிக்கை எதிரானால் ஏற்க மாட்டோம்: கேரளம்

by **ஜனனி** Wed Jan 25, 2012 6:45 am

சென்னை,
ஜன. 24: முல்லைப் பெரியாறு அணை விவகாரத்தில் நிபுணர் குழுவின் அறிக்கை
கேரள அரசுக்கு எதிராக இருக்குமானால் அதனை ஏற்க மாட்டோம் என கேரள மீன்
வளத்துறை அமைச்சர் கே.பாபு தெரிவித்துள்ளார்.கேரள மீன் வளத்துறை
சார்பில் சர்வதேச வளர்ப்பு மீன் கண்காட்சி பிப்ரவரி 10-ம் தேதி முதல் 14-ம்
தேதி வரை கொச்சியில் உள்ள ஜவாஹர்லால் நேரு மைதானத்தில் நடக்கிறது.இது தொடர்பாக சென்னையில் செய்தியாளர்களிடம் செவ்வாய்க்கிழமை அவர் கூறியதாவது:உலகம்
முழுவதும் வீடுகளில் வளர்க்கப்படும் வண்ண மீன்கள் மூலமாக ரூ.5 ஆயிரம் கோடி
அளவுக்கு வர்த்தகம் நடைபெறுகிறது. இதனைக் கருத்தில் கொண்டு கேரள மீன்
வளத்துறை சார்பில் 2002-ம் ஆண்டு முதல் இரண்டு ஆண்டுகளுக்கு ஒரு முறை
வளர்ப்பு மீன் கண்காட்சி நடத்தப்பட்டு வருகிறது.இந்தியா முழுவதும்
உள்ள மீன் வணிகர்கள் மட்டுமின்றி, உலக அளவில் உள்ள மீன் வணிகர்கள் என 105
பேர் கண்காட்சியில் பங்கேற்க உள்ளனர். இதில் மீன் உணவு, மீன்கள் மூலம்
தயாரிக்கப்படும் மருந்து வகைகள், மீன் வளர்ப்புக் கருவிகளுடன்
கருத்தரங்கமும் கண்காட்சியில் இடம் பெறவுள்ளன என்றார்.பின்னர் செய்தியாளர்களுக்கு பேட்டி அளித்த போது முல்லைப் பெரியாறு அணை தொடர்பாக அவர் கூறியதாவது:முல்லைப்
பெரியாறு விவகாரத்தில் கேரள அரசு தெளிவாக உள்ளது. இதில் தமிழகத்துக்குத்
தேவையான அளவு தண்ணீர் தர தயாராக உள்ளோம். அதே போல் அணையின் பாதுகாப்பு
மிகவும் முக்கியமானது. தண்ணீர் தொடர்பாக எந்தப் பிரச்னையும் கிடையாது. ஆனால், அணையின் பலம் தொடர்பாகத்தான் பிரச்னை நிலவுகிறது. தமிழகத்தில்
ஏராளமான மலையாள மக்கள் வாழ்ந்து வருகின்றனர். தமிழகத்துடன் நல்ல உறவு
இருந்து வருகிறது. முல்லைப் பெரியாறு மிகவும் பழமை வாய்ந்த அணையாகும், பழைய
தொழில்நுட்பத்தைக் கொண்டு கட்டமைக்கப்பட்ட அணையாகும். அணை உடைந்தால் 5 மாவட்டங்களில் வசிக்கும் 35 லட்சம் மக்கள் பாதிக்கப்படுவர். இந்த விவகாரத்தில் நீதிமன்றத்துக்கு வெளியே பேச்சுவார்த்தையின் மூலம் தீர்வு காண கேரள அரசு தயாராக உள்ளது. முல்லைப்
பெரியாறு அணை தொடர்பான நிபுணர் குழு அறிக்கை இன்னும் வெளியாகவில்லை.
ஆனால், கேரள அரசுக்கு எதிராக அறிக்கை இருக்குமானால் அதனை ஏற்க மாட்டோம்.
இப்பிரச்னையில் பேச்சுவார்த்தையின் மூலம் மட்டுமே தீர்வு காண முடியும் என
அவர் தெரிவித்தார்.இந்த நிகழ்ச்சியின்போது கேரள மீன் வளத்துறை இயக்குநர் சி.ஏ.லதா, செயல் இயக்குநர் ஏ.கோபாலகிருஷ்ணன் ஆகியோர் உடனிருந்தனர்.