தமிழக அமைச்சரவையில் மீண்டும் மாற்றம்: இருவருக்கு "கல்தா'

by **அருள்** Sat Dec 10, 2011 7:46 am

சென்னை: தமிழக அமைச்சரவையில் இருந்து, பரஞ்ஜோதி ராஜினாமா செய்தார்.
செல்வி ராமஜெயம் பதவி பறிக்கப்பட்டுள்ளது. இவர்களுக்கு பதிலாக, இந்து சமய
அறநிலையத் துறை அமைச்சராக திருப்பூர் ஆனந்தனும், சமூகநலத் துறை அமைச்சராக
வளர்மதியும் நியமிக்கப்பட்டுள்ளனர்.

தமிழக அமைச்சரவையில் ஏற்கனவே மூன்று முறை மாற்றம் செய்யப்பட்டது. இது
தவிர, இலாகாக்களும் அவ்வப்போது மாற்றப்பட்டன. இந்நிலையில், கடந்த அக்டோபர்
மாதம் நடந்த திருச்சி மேற்கு இடைத் தேர்தலில் வெற்றி பெற்ற பரஞ்ஜோதி,
நவம்பர் 6ம் தேதி அமைச்சராக பதவியேற்றார். இவருக்கு, அறநிலையத் துறை, தமிழ்
வளர்ச்சி, சட்டம், நீதி, சிறைத் துறை ஆகிய முக்கிய பொறுப்புகள்
வழங்கப்பட்டன. ஆனால், இவர் மீது இடைத்தேர்தலின் போதே, திருச்சியைச் சேர்ந்த
டாக்டர் ராணி, பாலியல் புகார் கொடுத்தார். அமைச்சரான நிலையில், இவர் மீது
எப்.ஐ.ஆர்., பதிவு செய்ய, கோர்ட் உத்தரவிட்டது. இதையடுத்து, இவர் மீது
இரண்டு வழக்குகள் நேற்று பதிவு செய்யப்பட்டன. இதைத் தொடர்ந்து, மேலிடத்தின்
உத்தரவுப்படி, தனது அமைச்சர் பதவியை ராஜினாமா செய்வதாக பரஞ்ஜோதி கடிதம்
கொடுத்தார். இதை ஏற்று, இவரை அமைச்சரவையில் இருந்து, கவர்னர் ரோசய்யா
விடுவித்தார். இத்துடன், அமைச்சர் செல்வி ராமஜெயத்தையும் அமைச்சரவையில்
இருந்து நீக்க, முதல்வர் ஜெயலலிதா பரிந்துரைத்து இருந்தார். இதையும் ஏற்று,
இவரையும் அமைச்சரவையில் இருந்து, கவர்னர் நீக்கியுள்ளார். இவர்களுக்கு
பதிலாக, சென்னையைச் சேர்ந்த வளர்மதி, திருப்பூரைச் சேர்ந்த
எம்.எஸ்.எம்.ஆனந்தன் ஆகியோர் அமைச்சர்களாக நியமிக்கப்பட்டுள்ளனர்.
இவர்களில், வளர்மதிக்கு அவர் ஏற்கனவே முந்தைய அ.தி.மு.க., ஆட்சியில்
வகித்து வந்த, சமூகநலத் துறை ஒதுக்கப்பட்டுள்ளது. திருப்பூர் ஆனந்தனுக்கு
அறநிலையத் துறை ஒதுக்கப்பட்டுள்ளது.

அ.தி.மு.க., அரசு அமைந்த பிறகு, அறநிலையத் துறை சண்முகநாதனுக்கு
ஒதுக்கப்பட்டது. கடந்த முறை நடந்த அமைச்சரவை மாற்றத்தில், சண்முகநாதனிடம்
பதவி பறிக்கப்பட்டு, பரஞ்ஜோதி வசம் ஒப்படைக்கப்பட்டது. இதேபோல, ஆட்சி
அமைந்த போது, சட்டம் மற்றும் சிறைத் துறை அமைச்சராக இசக்கி சுப்பையா
நியமிக்கப்பட்டார். இவரது பதவி ஒரு மாதத்தில் பறிக்கப்பட்டது. இதன் பின்,
செய்தித் துறை அமைச்சர் செந்தமிழன் வசம், சட்டம், நீதி, சிறைத் துறை
ஒப்படைக்கப்பட்டது. எனினும், கடந்த முறை நடந்த அமைச்சரவை மாற்றத்தின் போது,
செந்தமிழனிடம் இருந்து அமைச்சர் பதவி பறிக்கப்பட்டது. இதன்பின், ராஜேந்திர
பாலாஜி செய்தித் துறை அமைச்சராகவும், சட்டம், நீதி, சிறைத் துறை ஆகியவை
புதிதாக பதவியேற்ற பரஞ்ஜோதியிடமும் வழங்கப்பட்டது. ஆறு மாதங்களில், சட்டத்
துறையை கவனித்து வந்த மூன்றாவது அமைச்சர் பதவியும் பறிக்கப்பட்டுள்ளது.
சட்டம், நீதி, சிறைத் துறை ஆகியவை, பள்ளிக் கல்வி அமைச்சர்
சி.வி.சண்முகத்திடம் ஒப்படைக்கப்பட்டுள்ளது. சட்டத்துறையை கவனிக்கும்
நான்காவது அமைச்சராக இவர் இருப்பார். செல்வி ராமஜெயம் முதலில் பதவியேற்ற
போது, சமூக நலன் மற்றும் சத்துணவுத் துறை அமைச்சராக இருந்தார். கடந்த
நவம்பரில் நடந்த அமைச்சரவை மாற்றத்தின் போது, சத்துணவுத் துறை இவரிடம்
இருந்து பிரிக்கப்பட்டு, எம்.சி.சம்பத்திடம் ஒப்படைக்கப்பட்டது
குறிப்பிடத்தக்கது.

பதவியேற்பு எப்போது: புதிதாக நியமிக்கப்பட்டுள்ள அமைச்சர்கள்
வளர்மதி, ஆனந்தன் ஆகியோரது பதவியேற்பு நிகழ்ச்சி, ராஜ்பவனில் வரும் 12ம்
தேதி மாலை 4.30 மணிக்கு நடைபெறுகிறது.

நீக்கப்பட்ட இரண்டு அமைச்சர்கள்: பரஞ்சோதி: திருச்சி மேற்கு
தொகுதி சட்டசபை தொகுதி இடைத்தேர்தலில் வெற்றி பெற்று எம்.எல்.ஏ., ஆன
பரஞ்சோதி, நவ., 6ம் தேதி இந்து சமய அறநிலைத்துறை மற்றும் சட்ட அமைச்சராக
பதவியேற்றார். பதவியேற்ற ஒரே மாதத்தில் பதவியை ராஜினாமா செய்துள்ளார்.

ராமஜெயம்: புவனகிரி சட்டசபை தொகுதியில் இருந்து எம்.எல்.ஏ.,
வாக தேர்ந்தெடுக்கப்பட்ட செல்வி.ராமஜெயம் மே 16ம் தேதி, சமூக நலத்துறை
அமைச்சராக பதவியேற்றார். நவ., 5ம் தேதி இவருக்கு மகளிர் நலன்,
மாற்றுத்திறனாளிகள் நலன் ஆகியவை கூடுதல் பொறுப்பாக வழங்கப்பட்டது. நேற்று
இவர் அமைச்சர் பதவியில் இருந்து நீக்கப்பட்டார். 6 மாதங்களில் பதவியை
இழந்துள்ளார்.