கனடா, ரொறன்ரோவில் கொட்டும் மழையிலும் உணர்வுடன் 'கறுப்பு யூலை' வணக்க நிகழ்வு

by **ஜனனி** Fri Jul 29, 2011 7:20 pm

கனடா, ரொறன்ரோவில் கனடியத் தமிழர் தேசிய அவையினரால் ஒழுங்கு செய்யப்பட்ட
கறுப்பு யூலை நாள் நிகழ்வு கொட்டும் மழையில் தோய்ந்தவாறு உணர்வுபூர்வமாக
நினைவுகோரப்பட்டது.

இந்நிகழ்வு யூலை மாதம் 23.2011 சனிக்கிழமை மாலை
5.00 மணிக்கு ரொறன்ரோ நகர மத்தியில் அமைந்துள்ள ஒன்ராரியோ பாராளுமன்றத்தின்
முன்பாக குயின்ஸ் பார்க் திடலில் நடைபெற்றது.

இந்நிகழ்வில் தமிழின அழிப்பின் 28ம் ஆண்டு நினைவு நாளான யூலை 23.2011
சனிக்கிழமை சிறிலங்கா அரசின் மீது சர்வதேச போர்க்குற்ற நீதிவிசாரணை மேலும்
தாமதமின்றி நடாத்தப்படவேண்டும், போர்க்கைதிகள் நிபந்தனையின்றி
விடுவிக்கப்படவேண்டும், சிறிலங்காமீது இராஜதந்திர பொருளாதாரத்தடை
விதிக்கப்படவேண்டும் ஆகிய மூன்று கோரிக்கைகள் முன்வைக்கப்பட்டன.

இந்நிகழ்வில் மனித உரிமை ஆர்வலர்கள், பாராளுமன்ற உறுப்பினர்கள்,
அரசியலாளர்கள் மற்றும் பல பிரமுகர்கள் கலந்துகொண்டனர். பொதுச்சுடர் ஏற்றி
நிகழ்வு ஆரம்பித்து வைத்ததைத் தொடர்ந்து தேசிய கீதங்கள் ஒலிபரப்பப்பட்டன.
அதனைத் தொடர்ந்து ஈகைச்சுடரேற்றல், அமைதி வணக்கம், மலர் வணக்கம் என்பன
இடம்பெற்றன.

தொடர்ந்து முன்னைநாள் பாராளுமன்ற உறுப்பினரான போறிஸ், அவர்கள் லிபரல்
கட்சிப் பாராளுமன்ற உறுப்பினர் பொப் றே அவர்களின் செய்தியையும், முன்னைநாள்
பாராளுமன்ற உறுப்பினர் றொப் ஒலிபன்ற், பாராளுமன்ற உறுப்பினர் ஜிம்
கரியானிஸ் அவர்களின் செய்தியையும் வாசித்தனர். தொடர்ந்து நாடாளுமன்ற
உறுப்பினர் கிளன் முறே அவர்களின் உரையும் 1983 யூலைக் கலவரத்தில்
பாதிக்கப்பட்ட திரு. அன்ரன் பிலிப் அவர்களின் உரையும் இடம்பெற்றன.

இன்றைய தினம் கொட்டும் மழையில் நனைந்தவாறு எமக்காக உரைநிகழ்த்திய
அரசியல் பிரமுகர்களுக்கு தமிழ் மக்கள் சார்பில் எமது இதயம் கனிந்த
நன்றிகள். முதியோர், இளையோர், குழந்தைகள் என வயது வேறுபாடின்றி
உணர்வுபூர்வமாக கலந்து கொண்டனர்.

கொட்டும் மழை காரணமாக ஒலிவாங்கி ஒலிபெருக்கி செயலிழந்துவிட்டன. அதனால்
மேற்கொண்டு நிகழ்வினை நடாத்தமுடியாத நிலை ஏற்பட்டாலும் மக்கள் உறுதியுடன்
மழையில் நனைந்தவாறு உறுதியெடுத்தே வீடு சென்றனர்.

இந்நேரத்தில்
கறுப்பு யூலை நிகழ்விற்காக நடனப்ப யிற்சிசெய்து நடனத்தை வழங்கமுடியால்
சென்ற மாணவர்களுக்கும் வானம் பாடிகள் இசைக்குழுவிற்கும் நன்றிகளைத்
தெரிவித்துக்கொள்கிறோம்.

பல தமிழ் வர்த்தக நிலையங்கள் தாமகவே இன்று மாலை தமது வர்த்தக
நிலையங்களை மூடி இந்நிகழ்வுக்கு ஒத்தாசை புரிந்தமை குறிப்பிடத்தக்கது.
கனடிய தேசிய ஊடகங்கள் இந்நிகழ்வுக்கு முக்கியத்துவம் கொடுத்ததுடன் நேரடி
ஒளி, ஒலிபரப்புச் செய்ததும் சிறப்பம்சமாகும்.

ரொறன்ரோவிலிருந்து ஒலி - ஒளிபரப்பாகும் பிரதான தமிழ் ஊடகங்களான
கனடியத்தமிழ் வானொலி, பல்கலாச்சார வானொலி, அனைத்துலக வானொலி, சர்வதேச தமிழ்
வானொலி, ரி.வி.ஐ தொலைக்காட்சி, தமிழ் வண் ஆகியன கறுப்பு யூலை
நிகழ்வுகளுக்கு முக்கியத்துவம் கொடுத்திருந்தமை குறிப்பிடத்தக்கது.

கனடியத் தமிழர் தேசிய அவையினருடன் ஊர்ச்சங்கங்கள் விளையாட்டுக்கழங்கள்
மற்றும் இளையோர் அமைப்பினர் என வயது வேறுபாடின்றி தமது உறுவுகளின் இழப்பினை
நினைந்து உணர்வு பூர்வமாக நிகழ்ச்சி ஏற்பாட்டில் ஆரம்பத்திலிருந்து
முடிவுறும்வரை பங்காற்றினர்.