ஸ்ரீரங்கம் கோவிலில் ஜெயலலிதா சாமி தரிசனம்: சொந்த செலவில் பேட்டரி கார் வழங்கினார்

by **அருள்** Sun Jun 19, 2011 5:17 pm

திருச்சி, ஜூன். 19-

ஸ்ரீரங்கம் கோவிலில் ஜெயலலிதா சாமி தரிசனம்: சொந்த செலவில் பேட்டரி கார் வழங்கினார் 877f9602-dcff-45d2-bad1-01c82985741f_S_secvpf

சட்டசபை
தேர்தலில் அ.தி.மு.க. அமோக வெற்றி பெற்று 3-வது முறையாக ஜெயலலிதா முதல்-
அமைச்சராக பதவி ஏற்றார். ஸ்ரீரங்கம் தொகுதியில் போட்டியிட்ட ஜெயலலிதா 41
ஆயிரத்து 848 ஓட்டுகள் வித்தியாசத்தில் வெற்றி பெற்றார்.

தேர்தலில்
தன்னை வெற்றி பெற செய்த ஸ்ரீரங்கம் தொகுதி வாக்காளர்களுக்கு நன்றி
தெரிவிப்பதற்காகவும், நலத்திட்ட உதவிகள் வழங்குவதற்காகவும், புதிய
திட்டங்களை தொடங்கி வைப்பதற்காகவும் முதல்- அமைச்சர் ஜெயலலிதா ஸ்ரீரங்கம்
தொகுதியில் இன்று (19-ந்தேதி) முதல் 3 நாட்கள் சுற்றுப்பயணம் செய்கிறார்.
இதற்காக ஜெயலலிதா சென்னையில் இருந்து இன்று காலை 9.30 மணிக்கு தனி விமானம்
மூலம் திருச்சி புறப்பட்டார். காலை 10.30 மணிக்கு திருச்சி போய்ச்
சேர்ந்தார்.

விமான நிலையத்தில் அவருக்கு சிறப்பான
வரவேற்பு அளிக்ககப்பட்டது. இதில் அமைச்சர்கள், கலெக்டர், அதிகாரிகள்,
அ.தி.மு.க. பிரமுகர்கள் ஜெயலலிதாவை வரவேற்றனர். விமான நிலைய வரவேற்பு
முடிந்ததும் முதல்-அமைச்சர் ஜெயலலிதா நேராக கார் மூலம் காலை 11 மணிக்கு
ஸ்ரீரங்கம் ரெங்கநாதர் கோவிலுக்கு சென்றார்.

ராஜகோபுரம்
முன்பு ஜெயலலிதாவுக்கு தங்க பூரண கும்ப மரியாதை அளிக்கப்பட்டது. கோவில்
குருக்கள், அதிகாரிகள் ஜெயலலிதாவை வரவேற்று கோவிலுக்குள் அழைத்துச்
சென்றனர். ரங்கநாதர் சன்னதி, தாயார் சன்னதி உள்பட அனைத்து சன்னதிகளிலும்
ஜெயலலிதா சாமி தரிசனம் செய்தார். அவருக்கு கோவில் பிரசாதம் வழங்கப்பட்டது.
பின்னர் கோவில் பிரகாரத்தை சுற்றி வந்தார்.

ஸ்ரீரங்கம்
கோவில் பிரகாரம் மிகப் பெரியது என்பதால் வயதான பக்தர்கள் சிரமமின்றி
சுற்றி வர ஜெயலலிதா தன் சொந்த செலவில் ரூ.4 1/2 லட்சத்தில் பேட்டரி கார்
வழங்கினார். இதில் 4 பேர் அமர்ந்து கோவில் பிரகாரத்தை சுற்றி வரலாம்.
ஸ்ரீரங்கம் கோவிலுக்குள் வந்த ஜெயலலிதா முதலில் இந்த பேட்டரி காரை தொடங்கி
வைத்து அதில் சிறிது தூரம் பயணம் செய்தார்.

ஸ்ரீரங்கம்
கோவில் நிர்வாகம் சார்பில் 12 பேர் அமரக்கூடிய பெரிய பேட்டரி கார்
வழங்கப்பட்டது. இந்த காரையும் ஜெயலலிதா தொடங்கி வைத்தார். 11.45 மணிக்கு
கோவிலில் இருந்து புறப்பட்டுச் சென்றார். முதல்-அமைச்சர் ஜெயலலிதா
ஸ்ரீரங்கம் கோவிலுக்கு வந்த போது அவருக்காக பக்தர்களுக்கு தடை ஏதும்
விதிக்கப்படவில்லை. வழக்கம் போல் பக்தர்கள் சாமி தரிசனம் செய்தனர்.

திருச்சியில்
ஜெயலலிதா வருகைக்காக போக்குவரத்து நிறுத்தப்படவில்லை. கட்- அவுட் போன்ற
பெரிய அளவில் ஆடம்பர வரவேற்பு எதுவும் இல்லாமல் எளிமையாக வரவேற்பு
அளித்தனர். சாலையின் இருபுறமும் அ.தி.மு.க. தொண்டர்களும், பொதுமக்களும்
திரளாக கூடியிருந்தனர். இன்று மாலை 6 மணிக்கு ஸ்ரீரங்கம் சித்திரை
வீதியில் அரசு நலத்திட்ட உதவி வழங்கும் விழா நடக்கிறது. இதில்
முதல்-அமைச்சர் ஜெயலலிதா கலந்து கொண்டு தொகுதி மக்களுக்கு பல்வேறு நலத்
திட்ட உதவிகளை வழங்குகிறார்.

புதிய
திட்டங்களுக்கு அடிக்கல் நாட்டுகிறார். இதற்காக அங்கு எளிமையான முறையில்
மேடை அமைக்கப்பட்டுள்ளது. பின்னர் ஸ்ரீரங்கம் மாம்பழச் சாலையில் உள்ள
சட்டமன்ற உறுப்பினர் அலுவலகத்தை தொடங்கி வைக்கிறார். இரவு சங்கம் ஓட்டலில்
தங்குகிறார். நாளை (20-ந் தேதி) மாலை 5 மணிக்கு நன்றி அறிவிப்பு
சுற்றுப் பயணம் தொடங்குகிறார். நாளை அந்தநல்லூர் ஒன்றியத்தில் உள்ள
கிராமங்களுக்கும், நாளை மறுநாள் (21-ந் தேதி) மாலை 5 மணிக்கு மணிகண்டம்
ஒன்றியத்தில் உள்ள கிராமங்களுக்கும் நேரில் சென்று வாக்காளர்களுக்கு
முதல்-அமைச்சர் ஜெயலலிதா நன்றி தெரிவிக்கிறார்.