விடுமுறையை இப்படியும் கழிக்கலாமே : விருத்தாசலம் மாணவ, மாணவியர் அசத்தல்

விருத்தாசலம் : விருத்தாசலத்தில் பொங்கல் விடுமுறையை பயனுள்ளதாக
கழிக்க, பள்ளி மாணவ, மாணவியர் பல்வேறு இடங்களுக்கு சென்று அதன் வரலாறுகளை
அறிந்து கொண்டனர்.
பள்ளி விடுமுறை என்றாலே மாணவ, மாணவியர் தங்கள் பொழுதைக் கழிப்பது,
"டிவி' முன்பு தான். பொங்கல் விடுமுறை என்றால் கேட்கவே வேண்டாம். இவற்றை
பொய்ப்பிக்கும் விதமாக விருத்தாசலம் மாணவ, மாணவியர், விடுமுறை என்றால்
பயனுள்ள நல்ல தகவல்களையும் சேகரிக்கலாம் என்பதை நிரூபித்துள்ளனர்.கடலூர்
மாவட்டம் விருத்தாசலத்தைச் சேர்ந்த பல்வேறு பள்ளிகளில் படிக்கும்
நண்பர்களான 10ம் வகுப்பு மற்றும் பிளஸ் 1, பிளஸ் 2 மாணவ மாணவியர் நேற்று
50க்கும் மேற்பட்டோர் ஒரே குழுவாக ஒன்று சேர்ந்தனர்.விருத்தாசலம்
பகுதியில் உள்ள முக்கிய இடங்களுக்குச் சென்று அதன் சிறப்பு மற்றும்
வரலாற்றை அறிந்து கொள்ள முடிவு செய்தனர். அதன்படி அனைவரும் ஒன்று கூடி,
விருத்தகிரீஸ்வரர் கோவிலுக்குச் சென்றனர். அங்கு அதிகாரிகளிடம் அதன்
வரலாறு குறித்து கேட்டறிந்தனர்.
அதேபோன்று ரயில்வே ஜங்ஷன், மணிமுக்தா ஆற்றுப் பாலம், தாலுகா அலுவலகம்
உள்ளிட்ட இடங்களுக்குச் சென்று, அந்த இடங்களின் சிறப்புகளைக் கேட்டு
தெரிந்து கொண்டனர்.தொடர்ந்து போலீஸ் ஸ்டேஷனுக்குச் சென்று இன்ஸ்பெக்டரிடம்
தங்களை அறிமுகப்படுத்திக் கொண்டனர்.மாணவ, மாணவியரின் ஆர்வத்தை அறிந்த
இன்ஸ்பெக்டர் சீராளன் அவர்களை அமர வைத்து உபசரித்து, போலீஸ் ஸ்டேஷனின்
செயல்பாடுகள், பணிகள், வழக்குகள் பதிவு செய்யும் முறைகள், பொதுமக்கள்
மற்றும் மாணவர்கள் தங்களுக்கு ஏற்படும் இன்னல்களுக்கு எவ்வாறு போலீஸ்
ஸ்டேஷனை அணுகுவது என்பது குறித்து விளக்கிக் கூறினார்.மாணவ, மாணவியருக்கு
ஏற்பட்ட சந்தேகங்களைத் தீர்த்து வைத்து மகிழ்ச்சியுடன் அவர்களை வழியனுப்பி
வைத்தார்.பள்ளிப் பருவத்தில் மாணவர்கள் எங்கே கெட்ட சகவாசமுள்ள
நண்பர்களுடன் கூடா நட்பு கூடி கெட்டுப் போய்விடுவார்களோ என பெற்றோருக்கு
ஏற்படும் அச்சத்தை உடைத்தெறியும் வகையில், விருத்தாசலத்தில் மாணவ,
மாணவியரின் இந்த புதிய அணுகுமுறை அனைவரையும் வியக்க வைத்தது.